ფინანსთა მინისტრ ნოდარ ხადურის თქმით, არცერთი განცხადება, რომელიც კეთდება არ არის გამიზნული იმისთვის, რომ საქართველოს და სავალუტო ფონდს შორის ურთიერთობას ხელი შეუშალოს.
როგორც ხადური აცხადებს, სავალუტო ფონდი ქვეყნის სტრატეგიული პარტნიორია.
„ჩვენ სავალუტო ფონდთან ჩვეულ რეჟიმში ვმუშაობთ. ბატონი ბიძინა აკეთებს განცხადებებს, რომელიც მას მიაჩნია სწორად. მინდა გითხრათ, რომ ვერანაირი განცხადებები ვერ შეუშლის და არც არის გამიზნული იმისთვის, რომ ხელი შეუშალოს ამ ურთიერთობებს, პირიქით, სავალუტო ფონდი საქართველოს სტრატეგიული პარტნიორია“, – განაცხადა ხადურმა.
შეგახსენებთ, რომ ყოფილი პრემიერ-მინისტრის ბიძინა ივანიშვილის განცხადებით, საერთაშორისო სავალუტო ფონდის წარმომადგენელმა მას სთხოვა, რომ ეროვნული ბანკის პრეზიდენტი გიორგი ქადაგიძე არ დაეკავებინათ. ექსპრემიერის თქმით, მან ამის გამო მთავარი პროკურატურიდან განცხადება, რომელიც „ქართუ ბანკის“ საქმეს უკავშირდებოდა, პირადი გადაწყვეტილებით გამოიტანა.
“მათ იცოდნენ, რომ კანონი დაარღვია და ის დასაჭერია. მას არ უთქვამს რომ დასაჭერია არაა, ჩვენ ვიცით რომ ის დასაჭერია, იქნებ აპატიოთო. მეც ვუთხარი, რომ რაც პირადულია, შემიძლია, რომ გავაკეთო და პროკურატურიდან საქმე გამოვიტანე, რაზეც ჯავახიშვილი ძალიან განაწყენდა. რაც შეეხება საერთო საქმეებს, მე განვმარტე, რომ თუ მას სახელმწიფოსთან მიმართებაში აქვს რაიმე დარღვევა, მე ხელს ვერ დავაფარებ“, – განაცხადა ივანიშვილმა.
საერთაშორისო სავალუტო ფონდის მისიის ხელმძღვანელი აზიმ სადიკოვი კი აცხადებს, რომ ფონდი ვერ მიიღებს მხედველობაში მართლმსაჯულებასთან და ინდივიდუალური პირების კანონთან მიმართებაში დაკავშირებულ საკითხებს. სადიკოვის თქმით, მართლმსაჯულებასთან და ინდივიდუალური პირების კანონთან მიმართებაში დაკავშირებულ საკითხები მისიის მანდატი არაა.
