საქართველოს საგანგებო და სრულუფლებიანი ელჩი გერმანიის ფედერაციულ რესპუბლიკაში ლადო ჭანტურია 9 ივნისს შეხვდა გერმანიის ბუნდესტაგის წევრს, მმართველი ქრისტიანულ-დემოკრატიული კავშირისა და ქრისტიანულ-სოციალური კავშირის ფრაქციის თავმჯდომარის მოადგილეს, გერმანიის თავდაცვის ყოფილ მინისტრს ფრანც იოზეფ იუნგს. როგორც “თბილისი თაიმსს” საგარეო უწყებიდან აცნობეს, შეხვედრაზე ელჩმა გერმანელ პოლიტიკოსს მადლობა გადაუხადა 26 მარტს გერმანიის ბუნდესტაგში ევროპის კავშირსა და საქართველოს შორის ასოცირების ხელშეკრულების რატიფიკაციის დროს სიტყვით გამოსვლისას საქართველოს მიმართ გამოჩენილი მხარდაჭერისათვის. ბატონმა იუნგმა დადებითი შეფასება მისცა საქართველოს ევროპულ ორიენტაციას, საქართველოს მოსახლეობის პროევროპულ განწყობას და ქვეყნის ხელისუფლების მიერ გატარებულ რეფორმებს. მან ხაზგასმით აღნიშნა, რომ საქართველოს აქვს დიდი შანსი გახდეს ნამდვილად ევროპული სახელმწიფო და ევროპული ოჯახის წევრი. მისი განცხადებით, სასიამოვნოა, რომ პოლიტიკური ელიტა საქართველოში, მიუხედავად შიდაპოლიტიკური დისკუსიებისა, ერთსულოვანია ქვეყნის დასავლურ კურსში. იუნგი საქართველოს თავდაცვის მინისტრის პოსტზე საქმიანობისას არაერთხელ იმყოფებოდა საქართველოში , რა დროსაც გამართა სხვადასხვა შეხვედრებიქართველ სახელმწიფო და საზოგადო მოღვაწეებთან.
