სახელმწიფო ბიუჯეტის კორექტირების ფარგლებში, ადმინისტრაციული და მიმდინარე ხარჯები შემცირდება, – ამის შესახებ ჟურნალისტებს მთავრობის დღევანდელი სხდომის შემდეგ ფინანსთა მინისტრმა ნოდარ ხადურმა განუცხადა.
მისივე მტკიცებით, დაგეგმილი არ არის არც ერთი სოციალური პროექტის შემცირება.
“შემცირდება მხოლოდ ადმინისტრაციული და მიმდინარე ხარჯები და არ მოხდება სოციალური პროექტების დაფინანსების შემცირება, მათ შორის არ შემცირდება ჯანდაცვის სამინისტროს პრაქტიკულად არც ერთი მიმდინარე პროექტი”, – განაცხადა ნოდარ ხადურმა.
რაც შეეხება ზოგადად ეკონომიკაში შექმნილ ვითარებას, ფინანსთა მინისტრმა კიდევ ერთხელ გაუსვა ხაზი, რომ შექმნილი ვითარება გარე ფაქტორებით არის გამოწვეული.
“სწორედ გარე ფაქტორებით არის გამოწვეული, რომ შემცირებულია ექსპორტი და ინვესტიციები – საქართველოს ეკონომიკაზე გავლენა მოახდინა რეგიონში მიმდინარე ფაქტორებმა, რაც აღნიშნულია ყველა ექსპერტის, მათ შორის საერთაშორისო ორგანიზაციების დასკვნებშიც, რომლებიც პირუთვნელად აფასებენ მდგომარეობას. თქვენ თუ გადახედავთ ჩვენს მეზობლებში არსებულ ვითარებას, მათ შორის გაცვლით კურსსა და ეკონომიკურ ზრდასთან მიმართებაში, ნახავთ, რომ საქართველოში მიხედავად იმისა, რომ არ ვართ შექმნილი რეალობით კმაყოფილი, მდგომარეობა სხვებთან შედარებით უკეთესია”, -განაცხადა ხადურმა.