საგარეო საქმეთა სამინისტროს პრესსპიკერის დავით კერესელიძის თქმით, ტერორიზმის შესახებ აშშ-ის 2014 წლის ანგარიშში, საქართველოს აქტიური ჩართულობა ტერორიზმთან ბრძოლის მიმართულებით, აშშ-სთან თანამშრომლობაშია აღნიშნული.
როგორც დავით კერესელიძემ ორშაბათის ტრადიციულ ბრიფინგზე აღნიშნა, ანგარიშში განსაკუთრებით დადებითად არის შეფასებული საქართველოს მიერ კონტრტერორისტული კანონმდებლობის გაძლიერებისკენ მიმართული ნაბიჯები, კერძოდ საქართველოს სისხლის სამართლის კოდექსში ინიცირებული ცვლილებები.
“ანგარიშში აღნიშნულია, რომ საქართველომ აგრეთვე შეცვალა რეგულაციები, რათა ქვეყნის საზღვრებზე უსაფრთხოება გაეძლიერებინა. ანგარიშის მიხედვით, საქართველოს მთავრობას აქვს შესაძლებლობები აღმოაჩინოს, თავიდან აიცილოს და საჭიროების შემთხვევაში, უპასუხოს ტერორისტუულ ინციდენტებს. დადებითად არის შეფასებული საქართველოს მიერ შემუშავებული სტრატეგია და სამოქმედო გეგმა ფულის გათეთრების და ტერორისტების დაფინანსების წინააღმდეგ ბრძოლის კუთხით. ანგარიშში ასევე აღნიშნულია საქართველოს პრემიერ-მინისტრის, ირაკლი ღარიბაშვილის მიერ გაცხადებული მზაობა, საქართველომ ჰუმანიტარული დახმარება გაუწიოს ISIL-ის წინააღმდეგ გლობალურ კოალიციას”, – განაცხადა დავით კერესელიძემ.
