საქართველოს საგარეო საქმეთა მინისტრის, თამარ ბერუჩაშვილის ოფიციალური ვიზიტი არგენტინის რესპუბლიკაში გუშინ დაიწყო.
როგორც “თბილისი თაიმსს” საქართველოს საგარეო საქმეთა სამინისტროდან აცნობეს, მინისტრმა შეხვედრა გამართა არგენტინის ვიცე–პრეზიდენტთან და სენატის თავმჯდომარესთან ამადო ბუდუსთან. შეხვედრის ფარგლებში მხარეებმა განიხილეს ქვეყნებს შორის არსებული ორმხრივი თანამშრომლობა პოლიტიკურ, სავაჭრო-ეკონომიკურ, კულტურულ და საგანმანათლებლო სფეროებში.
უწყების ინფორმაციით, განსაკუთრებით ხაზი გაესვა ორი ქვეყნის ურთიერთობების განვითარებაში საპარლამენტო კავშირების გაძლიერების მნიშვნელობას.
მათივე ცნობით, 22 ივნისს მინისტრი ასევე სიტყვით გამოვიდა არგენტინის საგარეო ურთიერთობათა ეროვნულ ინსტიტუტში, სადაც თამარ ბერუჩაშვილმა მიმოიხილა საქართველოს საგარეო პოლიტიკის ძირითადი მიმართულებები, ასევე ისაუბრა ლათინური ამერიკის რეგიონთან საქართველოს თანამშრომლობის პრიორიტეტებზე.
ამავე დღეს მინისტრმა შეხვედრა გამართა ბუენოს-აირესში აკრედიტებული ლათინური ამერიკის ქვეყნების ელჩებთან, რომელსაც ესწრებოდნენ არგენტინაში ბრაზილიის, ურუგვაის, პერუს, კოლუმბიის, ბოლივიის, მექსიკის, გვატემალის, ელ სალვადორის, პანამის, კოსტა-რიკის ელჩები.
ბუენოს-აირესში ვიზიტით სამხრეთ კონუსის ქვეყნებში საგარეო საქმეთა მინისტრის რეგიონული ტურნე დაიწყო. მინისტრი ბერუჩაშვილი 24 ივნისს ურუგვაის აღმოსავლურ რესპუბლიკას, ხოლო 25-26 ივნისს ჩილეს რესპუბლიკას ეწვევა.