დღეს საქართველოში ბევრი ავტომობილია, თავისი გამოცდილი თუ გამოუცდელი მძღოლით და სამწუხაროდ, ესეც ერთ-ერთი მიზეზია ხშირი საავარიო შემთხვევების. შეიძლება ითქვას, რომ კულტურა როგორიც არის – ავტომობილების დაზღვევა ამ ეტაპზე ჯერ კიდევ განვითარების გზაზე დგას…..
„თბილისი თაიმსის“ მორიგი ბლის გამოკითხვა ავტომობილების დაზღვევას და მისი განვითარების პერსპექტივებს ეხება.
გამოიკითხა ბაზარზე არსებული 3 კომპანია: “ჯი პი აი ჰოლდინგი”; „ალდაგი ბისიაი“; „ირაო“. აღმოჩნდა, რომ ავტომობილების დაზღვევა შეუძლია ყველა მძღოლს 21 წლის ზევით, ასვე სამივე კომპანია საუბრობს ავტომობილების დაზღვევის მსურველთა ზრდაზე.
ჯი პი აი ჰოლდინგი:
„ავტომობილების დაზღვევის ღირებულება მანქანის მოდელზე, გამოშვების წელზე, მძღოლის გამოცდილებაზე და სხვა მსგავს ფაქტორებზეა დამოკიდებული. ზოგადად, დაზღვევის ღირებულება სადაზღვევო თანხის 3,5%-დან იწყება და საშუალოდ 4%-ს შეადგენს. ავტომობილების დაზღვევაზე მოთხოვნა წლიდან წლამდე იმატებს.
დამზღვევის ასაკი აუცილებელია აღემატებოდეს 21 წელს. გარდა ამისა, მნიშვნელოვანი ფაქტორია სადაზღვევო შემთხვევების რაოდენობა, მართვის გამოცდილება, ავტომობილის მახასიათებლები. თუმცა ეს ფაქტორები მხოლოდ ფასზე აისახება და დაზღვევის საჭიროების შემთხვევაში, ჩვენ რა თქმა უნდა ვაფორმებთ ხელშეკრულებას.“
ალდაგი ბისიაი:
„ჩვენ საკმაოდ მრავალფეროვანი არჩევანი გვაქვს პროდუქტების მხრივ. ბუნებრივია, პროდუქტების მიხედვით ფასებიც ცვალებადია. დღევანდელ ბაზარზე ფასის მხრივ ჩვენი პროდუქტი ნამდვილად კონკურენტუნარიანია, რაზეც ჩვენი წილის მოცულობა ბაზარზე კარგად მეტყველებს. ზოგადად ავტომობილის დაზღვევის ფასი ბევრ ნიუანსზეა დამოკიდებული, ამიტომ ზოგადი ფასის თქმა შეუძლებელია. ზოგადად დაზღვევით და განსაკუთრებთ ავტომობილის დაზღვევის მსურველთა რიცხვი ყოველწლიურად იზრდება. საქართველოში გარკვეულწილად უკვე ჩამოყალიბდა ავტომობილის დაზღვევის კულტურა და ამ პროცესში ალდაგს დიდი წვლილი მიუძღვის.
როგორც უკვე მოგახსენეთ ჩვენ მრავალფეროვანი არჩევანი გვაქვს პროდუქტების მხრივ და შეგვიძლია თითქმის ყველა მანქანის დაზღვევა. რაც შეეხება მძღოლს, ყველაზე მთავარ პირობას გამოვყოფდით ასაკს. ისევე, როგორც სხვა კომპანიები ჩვენც დაზღვევას 21 წლის ზემოთ ყველა პირს ვთავაზობთ, ვისაც მართვის მოწმობა აქვთ აღებული.“
ირაო:
„ჩვენ გვაქვს გადახდის განსხვავებული სისტემა ეს ხდება ტარიფის გათვლით ინდივიდუალურ რეჟიმში, მძღოლის ტარების ისტორიაზე დაყრდნობით მაგ: ჯარიმებისა და ავტოსაგზაო შემთხვევების მიხედვით ვეყრდნობით მონაცემებს.
ჩვენი დაზღვევით, ამ დრომდე ისარგებლა დაახლოებით სამი ათას სამასმა მომხმარებელმა, მათი რიცხვი გაიზარდა. ზოგადად ბაზარზე წინა წელთან შედარებით 25%-ით გაიზარდა მოთხოვნა, თუმცა საერთო ჯამში მოთხოვნა მაინც დაბალია. მძღოლს, რომელსაც სურს ავტომობილი ჩვენთან დააზღვიოს უნდ აჰქონდეს 5-ზე ნაკლები ჯარიმა მას უპირატესობა ენიჭება ტარიფის მხრივ. არ უნდა იყოს ავარიების შემთხვევები დ აუნდა ჰქონდეს ტარების არანაკლებ 6-წლიანი გამოცდილება.“
„თბილისი თაიმსი“ ასევე დაუკავშირდა სადაზღვევო კომპანია “არქიმედეს გლობალ ჯორჯიას“, მათი განცხადებით, კომპანია კოტრდება. ჩვენ ასევე დაუკავშირდით კომპანიებს “აი სი ჯგუფს“ და „PSP დაზღვევას“ თუმცა მათ თავი შეიკავეს კითხვებზე პასუხის გაცემისგან.
მასალა მოამზადა
სალომე აფხაზაშვილმა
–
