თბილისის საქალაქო სასამართლომ 14 ივნისს განაჩენი გამოიტანა ციხის სკანდალთან დაკავშირებულ საქმეზე, რომელსაც შარშანდელ საპარლამენტო არჩევნებამდე ჰქონდა ადგილი მას შემდეგ, რაც 2012 წლის სექტემბერში პატიმართა წამების შოკისმომგვრელი ვიდეოჩანაწერები აჩვენეს ტელევიზიით.
სასჯელაღსრულების სისტემის 17 ყოფილ თანამშრომელს, რომელთაგანაც ბევრი ვიდეოჩანაწერების გავრცელებიდან მალევე დააპატიმრეს, გლდანის N8 დაწესებულების პატიმართა წამება და არაადამიანური და ღირსების შემლახველი მოპყრობა ედებოდათ ბრალად.
სასამართლომ დამნაშავედ ცნო ექვსი მათგანი, რომელთაც სხვადასხვა ვადიანი პატიმრობა შეეფარდათ; რვა პირის მიმართ სხვადასხვა პირობებით დამტკიცდა საპროცესო შეთანხმება; ხოლო ორ პირის მიმართ სასამართლომ წარდგენილი ბრალდება გადააკვალიფიცირა სხვა მუხლზე და მათი მსჯავრდება მოხდა დანაშაულის შეუტყობინებლობისათვის.
ამ 17 პირიდან ერთს, ვლადიმერ ბედუკაძეს, არანაირი სასჯელი არ შეეფარდა მას შემდეგ რაც მასთან პროკურატურამ საპროცესო შეთანხმება გააფორმა.
ბედუკაძემ, რომელსაც პატიმართა არაადამიანურ მოპყრობაში ედებოდა ბრალი, აღიარა, რომ პატიმართა წამების ამსახველი ვიდეოები მის მიერ იყო გადაღებული. იმ დროს, როდესაც ვიდეოები 2012 წლის სექტემბერში ტელევიზიით გაუშვეს, ბედუკაძე ბელგიაში იმყოფებოდა და საქართველოში 2012 წლის ოქტომბრის საპარლამენტო არჩევნების შემდეგ დაბრუნდა; იგი დააკავეს, თუმცა 2 000 ლარიანი გირაოთი გაათავისუფლეს.
„საქართველოს მთავარი პროკურორის არჩილ კბილაშვილის შუამდგომლობის საფუძველზე, ბრალდებული ვლადიმერ ბედუკაძე, მიუხედავად მისი მხრიდან დანაშაულის ჩადენის ფაქტის არსებობისა, ’’განსაკუთრებული თანამშრომლობის შესახებ’’ საპროცესო შეთანხმების შედეგად, გათავისუფლდა სისხლის სამართლის პასუხისმგებლობისაგან“, – განაცხადა თბილისის საქალაქო სასამართლომ 14 ივნისს განაჩენის გამოტანის შემდეგ.
ბრალდების მხარის ამგვარი შუამდგომლობა მოსალოდნელი იყო მას შემდეგ, რაც მთავარმა პროკურორმა არჩილ კბილაშვილმა განაცხადა ერთი კვირის წინ ბედუკაძის შესახებ საუბრისას, რომ მას აქვს უფლება ბედუკაძეს ბრალდებები მოუხსნას იმის საფუძველზე, რომ ეს უკანასკნელი საქართველოს სასჯელაღსრულების სისტემაში „სისტემური დანაშაულების“ გამოვლენაში დაეხმარა.
„ამ ადამიანმა თავისი ხელით წარმოადგინა ეს კადრები და რომ არა მის მიერ ამ კადრების წარმოდგენა, ის ისევ უდანაშაულო იქნებოდა და ჩვენთვის, დანარჩენი საზოგადოებისთვის ამ ქმედების შესახებ უცნობი იქნებოდა“, – განუცხადა კბილაშვილმა საზოგადოებრივ მაუწყებელს 7 ივნისს.
„ამ კადრებმა გადაარჩინა ათასობით პატიმარი მომავალში წამებისა და ცემისაგან“, – განაცხადა კბილაშვილმა, რომელმაც უარყო ბრალდებები, რომ ბედუკაძემ მხოლოდ მას შემდეგ გაასაჯაროვა ვიდეომასალა, რაც კოალიცია ქართული ოცნებისგან ფული აიღო; კბილაშვილმა განაცხადა, რომ ბედუკაძე პირადი ინტერესის გარეშე მოქმედებდა.
საქმის არსებითი განხილვა დახურულ სასამართლო სხდომებზე მიმდინარეობდა, როგორც სასამართლომ განაცხადა, „პროცესის მონაწილეთა პირადი საიდუმლოების დაცვის მიზნით“.
სასჯელაღსრულების დეპარტამენტის უფროსის ყოფილ მოადგილეს გაგა მკურნალიძეს 3 წლის, 4 თვის და 15 დღის ვადით თავისუფლების აღკვეთა მიესაჯა; მას ასევენ ჩამოერთვა თანამდებობის დაკავების უფლება 1 წლის და 6 თვის ვადით, ასევე განესაზღვრა ჯარიმა 3 000 ლარის ოდენობით.
გლდანის მერვე დაწესებულების ყოფილ უფროსს დავით ხუჭუას სასჯელის სახედ და ზომად განესაზღვრა თავისუფლების აღკვეთა 3 წლის და 3 თვის ვადით და 1 წლით 6 თვით ჩამოერთვა თანამდებობის დაკავების უფლება, ასევე დაეკისრა ჯარიმა 2000 ლარის ოდენობით.
იმავე დაწესებულების უფროსის ყოფილ მოადგილეს ვიქტორ ყაჭეიშვილს სასჯელის სახედ და ზომად განესაზღვრა თავისუფლების აღკვეთა 3 წლის და 3 თვის ვადით და 1 წლის და 6 თვის ვადით ჩამოერთვა თანამდებობის დაკავების უფლება, ასევე განესაზღვრა ჯარიმა 2 000 ლარის ოდებით.
იმავე დაწესებულების კიდევ ორ თანამშრომელს, ოლეგ ფაცაციას და ლევან ფურცხვანიძეს 6 წლის და 9 თვის ვადით თავისუფლების აღკვეთა განესაზღვრათ.
გიორგი კვარაცხელიას სასჯელის სახედ განესაზღვრა თავისუფლების აღკვეთა 3 წლის ვადით და ჯარიმა 2000 ლარის ოდენობით.
რვა პირი, რომელთა მიმართ სხვადასხვა პირობებით დამტკიცდა საპროცესო შეთანხმება, არიან: მამუკა ჩხიტუნიძე და ლევან ფხალაძე, რომელთაც ხუთწლიანი პატიმრობა მიესაჯათ; კობა ჩიკვატიას განესაზღვრა თავისუფლების აღკვეთა 2 წლის ვადით და ჯარიმა 2 000 ლარის ოდენობით; გურამ ცომაიას სასჯელის სახედ და ზომად განესაზღვრა თავისუფლების აღკვეთა 1 წლის და 6 თვის ვადით და ჯარიმა 2 000 ლარის ოდენობით; ბორის ფარულავას და მანუჩარ ლომთაძეს სასჯელის სახედ განესაზღვრათ თავისუფლების აღკვეთა 9 თვის ვადით (რომელიც მათ უკვე მოიხადეს წინასწარ პატიმრობაში); ამ უკანასკნელს 2 000 ლარის ჯარიმაც დაეკისრა; ალექსანდრე ჯანჯღავას და დავით მეცხოვრიშვილს სასჯელის სახედ და ზომად განესაზღვრათ თავისუფლების აღკვეთა 6 თვის ვადით და ჯარიმა 2 000 ლარი, მათ თავისუფლება აღეკვეთათ სასამართლო სხდომის დარბაზში, ვინაიდან ისინი ამ იმყოფებოდნენ წინასწარ პატიმრობაში.
სასამართლომ გადაწყვიტა, რომ გადაეკვალიფიცირებინა ბრალდებები ციხის ორი ყოფილი თანამშრომლის, თემურ ჭაჭიას და მათე ელბაქიძის მიმართ და მათი მსჯავრდება მოხდა დანაშაულის შეუტყობინებლობისათვის. ორივე მათგანს სასჯელის სახედ განესაზღვრათ თავისუფლების აღკვეთა 1 წლის და 6 თვის ვადით და ჯარიმა 2 000 ლარის ოდენობით თითოეულს.
17.06.13
