პრემიერის სპეციალური წარმომადგენელი ზურა აბაშიძე აპირებს, საზღვრისპირა სოფლებში შექმნილ პრობლემებს, რუსეთის წარმომადგენელ გრიგორი კარასინთან, 15 ივლისს, პრაღაში დაგეგმილ შეხვედრაზე ხაზი გაუსვას.
როგორც აბაშიძემ სოფელ ორჭოსანში ოკუპანტების მიერ შექმნილი პრობლემების გაცნობის შემდეგ განაცხადა, რუსეთის საოკუპაციო ძალების ქმედებების შესახებ, საერთაშორისო საზოგადოებას, ინფორმაცია დროულად უნდა მოეწოდოს.
აბაშიძის თქმით, ეს არის რუსეთის მხრიდან პრიმიტიული, თუმცა, საშიში პროვოკაცია.
„მაქსიმალურად მწვავედ ვფიქრობ, რომ ეს საკითხი დავაყენო პრაღაში. ახლა ამას უკვე არ აქვს მნიშვნელობა, რისთვის არის ეს ფორმატი შექმნილი. ამის გვერდზე ავლა და იგნორირება სრულიად წარმოუდგენელია. კონკრეტულ ხალხზე, ადამიანებზე გვაქვს საუბარი, რომლებიც ჯერ კიდევ ასეთ გაურკვეველ მდგომარეობაში რჩებიან. ხვალ და ზეგ რა იქნება, არავინ იცის“, – განაცხადა აბაშიძემ.
რუსეთის საოკუპაციო ძალებმა 10 ივლისს გორის რაიონის სოფელ წითელუბნის და ოკუპირებული ახალგორის რაიონის სოფელ ორჭოსანის მიმდებარე ტერიტორიაზე, თბილისი-გორის ცენტრალური ავტომაგისტრალის სიახლოვეს, ე.წ. „საზღვრის“ აღმნიშვნელი ბანერები აღმართა. აღნიშნული სოფლის სიახლოვეს მდებარეობს ბაქო-სუფსას მილსადენის გარკვეული მონაკვეთები, განხორციელებული ქმედებების შედეგად კი, სოფელ ორჭოსანის მიმდებარე ტერიტორიაზე, ნავთობსადენის გარკვეული ნაწილი ოკუპირებულ ტერიტორიაზე მოექცა.
