14 ივლისი ნოდარ დუმბაძის დაბადების დღეა. როგორც “თბილისი თაიმსს” საქართველოს კულტურისა და ძეგლთა დაცვის სამინისტროდან აცნობეს, ამ თარიღთან დაკავშირებით ჩოხატაურში, ნოდარ დუმბაძის სახლ-მუზეუმში, მინისტრი მიხეილ გიორგაძე ფილმის “მე, ბაბუა, ილიკო და ილარიონი” ჩვენებას დაესწრება. ფილმის რეჟისორია ლევან მაჭარაშვილი, პროდიუსერი – ქეთი დუმბაძე.
სამინისტროს მხარდაჭერით, ნოდარ დუმბაძის სახლ-მუზეუმს ლიტერატურულ-საგანმანათლებლო პროექტის “ცოცხალი წიგნები” ფარგლებში, თანამედროვე ქართველი მწერლების ხუთკაციანი მობილური ჯგუფიც ეწვევა და ადგილობრივ მკითხველთან შეხვედრას გამართავს. ჯგუფის შემადგენლობაში არიან: გივი ალხაზიშვილი, ლელა სამნიაშვილი, ანდრო ბუაჩიძე, რეზო გეთიაშვილი, ეკა ქევანიშვილი. მეგობარი მწერლის სტატუსით ღონისძებას ირმა შიოლაშვილიც დაესწრება.
“ცოცხალი წიგნები” საქართველოს კულტურისა და ძეგლთა დაცვის სამინისტროს ლიტერატურულ-საგანმანათლებლო პროექტია და საქართველოს სხვადასხვა რეგიონის სოფლებისა და ქალაქების საჯარო სკოლებში, ბიბლიოთეკებში, მუზეუმებში, კულტურის სახლებსა და სხვა საჯარო დაწესებულებებში თანამედროვე მწერლების სტუმრობას და მკითხველთან შეხვედრას ითვალისწინებს. პროექტის ფარგლებში პოეზიის საღამოები ეწყობა და ადგილობრივ მოსახლეობასთან საინტერესო თემებზე დისკუსიები იმართება.
“მწერლები სტუმრობენ რეგიონის საპატიო, ხანდაზმულ, შეზღუდული შესაძლებლობის მქონე პირებს, ბაშვთა სახლებს, საჯარისო-სამხედრო ნაწილებს, სასჯელაღსრულებით დაწესებულებებს. შეხვედრები იმართება არაქართულენოვან მოსახლეობასთანაც. რეგიონებში ვიზიტისას, მწერლები ასევე ნიჭიერი ადგილობრივი შემოქმედების გამოვლენაზე ზრუნავენ”, – განაცხადეს სამინისტროში.
პროექტში საგამომცემლო სექტორიც აქტიურად არის ჩართული. ეწყობა ლოკალური წიგნის ბაზრობები, სადაც მწერლები გამავრცელებლების როლში არიან. “თავიანთ საავტორო წიგნებთან ერთად, ისინი პოპულარიზაციას უწევენ კოლეგების შემოქმედებასაც. რეგიონებში ვიზიტის პერიოდში, მწერლები აწარმოებენ დღიურებს და ჩანაწერებს, რომლის მიხედვითაც, პროექტის დასრულების შემდეგ გამოიცემა წიგნი “მწერლის დღიურები”, _ განმარტავენ სამინისტროში.
პროექტი 4 ეტაპად ხორციელდება და წლის განმავლობაში მასში სულ 75 მწერალი მიიღებს მონაწილეობას. გურიაში ვიზიტის ფარგლებში, “ცოცხალი წიგნები” ლანჩხუთსაც ეწვევა. ჯგუფის წევრები მკითხველთან შეხვედრას 15 ივლისს, 16:00 საათზე, ლანჩხუთის კულტურის ცენტრში გამართავენ.
