საქართველოს თავდაცვის მინისტრმა ქვეყნის მთავარსარდალს საფრანგეთთან გაფორმებული ხელშეკრულებების დეტალები პრეზიდენტის სასახლეში გააცნო. თავდაცვისუნარიანობის საკითხზე პარიზში ხელმოწერილ დოკუმენტებზე საუბარს თინათინ ხიდაშელთან ერთად თავდაცვის სამინისტროდან დაესწრნენ გენერალური შტაბის უფროსი, გენერალ-მაიორი ვახტანგ კაპანაძე, მინისტრის მოადგილე დავით ებრალიძე, ავიაციისა და საჰაერო თავდაცვის სარდალი, პოლკოვნიკი დავით აბრამიშვილი და საჰაერო თავდაცვის ბრიგადის მეთაური ლევან ილურიძე. შეხვედრაში პრეზიდენტის ადმინისტრაციის უფროსი დავით პატარაია, უშიშროების საბჭოს მდივანი ირინა იმერლიშვილი და მისი ორი მოადგილე მონაწილეობდნენ.
„მთავარსარდალს დეტალურად გავაცანით საფრანგეთთან გაფორმებული ორივე ხელშეკრულება. ასევე, გეგმა, რომელზეც უკვე დავიწყეთ მუშაობა, ერთი მხრივ, თავდაცვის სამინისტროში და, მეორე მხრივ, თავად ფრანგულ კომპანიებთან, იმ შესაძლებლობების მეტად გასაფართოებლად, რაც ქართულ სახელმწიფოს თავდაცვისუნარიანობის გასამყარებლად სჭირდება. მთავარსარდლისგან კონსულტაციები მივიღეთ. ბუნებრივია, ამ კონსულტაციების გარეშე ამგვარ საკითხზე შემდგომი მოლაპარაკებების დაწყება არ იქნება მართებული. მინისტრი, მთავარსარდალი და პრემიერ-მინისტრი ვთანხმდებით, რომ საქართველოს თავდაცვისუნარიანობა გაცილებით მყარი, ძლიერი და ნატოსთან თავსებადი საერთაშორისო თავდაცვისუნარიანობის სისტემის შემადგენელი კომპონენტი ხდება. ამ გზაზე კიდევ ბევრი ნაბიჯი გვაქვს გადასადგმელი, რასაც ყველა ერთობლივად უჭერს მხარს. თავდაცვის სამინისტროს შესაძლებლობა გვეძლევა, ოპერირება გაცილებით თავისუფალ სივრცეში განვახორციელოთ“, – განაცხადა შეხვედრის დასრულების შემდეგ თავდაცვის მინისტრმა.
ეროვნული უშიშროების საბჭოს მდივანმა კი აღნიშნა, რომ საფრანგეთთან გაფორმებული ხელშეკრულებებით თავდაცვისუნარიანობის საკითხი საქართველოსთვის სუსტი წერტილი აღარ იქნება.
„განვიხილეთ ყველა დეტალი, რომელზეც საუბარია საფრანგეთთან გაფორმებულ ხელშეკრულებებში. ცხადია, ეს ხელშეკრულებები საიდუმლოა და ამის გამჟღავნების უფლება არ მაქვს. თუმცა, შემიძლია ვთქვა, რომ თვისობრივად იზრდება საქართველოს თავდაცვისუნარიანობა, შეძენილია საჰაერო თავდაცვის სისტემები, რომელიც, როგორც გამოჩნდა, ჩვენი თავდაცვისუნარიანობის ყველაზე სუსტი წერტილი იყო“,- განაცხადა ირინა იმერლიშვილმა.
საჰაერო სისტემის თავდაცვისუნარიანობის საკითხზე საფრანგეთთან პირველი ხელშეკრულება 15 ივნისს, მეორე კი 10 ივლისს გაფორმდა.
