არჩილ თალაკვაძე: „საქართველოს ციხეებში გარდაცვალებათა 18%-ი გამოწვეულია C ჰეპატიტით“

დღეს, სასტუმრო  ”ქორთიარდ მერიოტში” სასჯელაღსრულების, პრობაციისა და      იურიდიული დახმარების საკითხთა სამინისტრომ და  ფონდმა  ”ღია საქზოგადოება-საქართველო” სასჯელაღსრულების დაწესებულებაში C ჰეპატიტის პრევენციის, დიაგნოსტირებისა და მკურნალობის პროგრამული დოკუმენტი წარმოდგინა.

როგორც ღონისძიებაზე ორგანიზატორებმა განაცხადეს, აღნიშნული პროგრამა სასჯელაღსრულების სისტემისთვის ფონდ ”ღია საზოგადოება საქართველოს” მხარდაჭერით ქართველმა და უცხოელმა ექსპერტებმა შეიმუშავეს.

მათივე განცხადებით, პროგრამული დოკუმენტის განხილვა მოხდა სამოქალაქო საზოგადოებასთან, რის შემდეგადაც ის მთავრობას და დონორ ორგანიზაციებს დასაფინანსებლად წარედგინებათ.

„C ჰეპატიტი სასჯელ-აღსრულებათა სისტემაში სიკვდილიანობის გამომწვევი ერთ-ერთი მთავარი მიზეზია. ციხეებში გარდაცვალებათა 18% გამოწვეულია C ჰეპატიტის შედეგად განვითარებული ცეროზით. ამ დაავადების დიაგნოსტიკა და მკურნალობა საკმაოდ ძვირადღირებულია, პატიმრებისთვის კი პრაქტიკულად ხელმიუწვდომელია. ამ პროგრამის წამოწყებით საქართველო გახდა მაგალითი იმ ქვეყნებისთვის რომლებშიც არ ტარდება მსგავსი კამპანიები,“ –  განაცხადა სასჯელაღსრულების, პრობაციისა და იურიდიული დახმარების მინისტრის მოადგილემ არჩილ თალაკვაძემ.

მისივე ინფორმაციით, საქართველოში C ჰეპატიტით დაავადებულია მოსახლოების 6,7%, დაავადებულთა 57-74% ნარკოტიკების მომხმარებელია, აგრეთვე დაავადებულთა შორის არიან ჰომოსექსუალები და ჯანდაცვის მუშაკები.

დაავადების დიაგნოსტიკა 1600 ლარი, ხოლო მკურნალობის 48 კვირიანი კურსი კი 24 000 ლარი ჯდება. საკუთარი სახსრებით მკურნალობა გაიარა მხოლოდ 2000 ადამიანმა. სამწუხაროდ, დღესდღეობით C ჰეპატიტის დიაგნოსტიკა და მკურნალობა არც სახელმწიფო და არც კერძო დაზღვევით არ ფინანსდება, განმარტავს თალაკვაძე.

ექსპერტების ვარაუდით, სასჯელაღსრულების სისტემაში პროგრამის დაწყება მოსახლეობისთვისაც  C ჰეპატიტის სამკურნალო მედიკამენტებზე ფასების შემცირებას გამოიწვევს.

პროგრამის მიზანია მსჯავრდებულთა ჯანმრთელობის მდგომარეობის გაუმჯობესება, დაავადებული პატიმრების დიაგნოსტიკა და მკურნალობა.

დისკუსიაში მონაწილეობა მიიღეს: აღმასრულებელი და საკანონმდებლო ხელისუფლების, არასამთვრობო სექტორის და C ჰეპატიტით ინფიცირებული თემის წარმომადგენლებმა.

20.06.13

ნინა პირტახია