თბილისის მერი, დავით ნარმანია 16 აგვისტოს სამდღიანი ვიზიტით ისრაელში გაემგზავრა. თბილისის მერიის ინფორმაციით, ვიზიტის ფარგლებში დაგეგმილია შეხვედრა იერუსალიმის მერთან. შეხვედრაზე საუბარი ორმხრივი თანამშრომლობის გაღრმავებასა და ძველი ქალაქის განვითარების მიმართულებით იერუსალიმის გამოცდილების გაზიარებას შეეხება. ვიზიტის საქართველო-ისრაელის ბიზნესპალატის მიერ არის ორგანიზებული.
თბილისის მერი სიტყვით გამოვა საქართველო-ისრაელის ბიზნესფორუმზე. დავით ნარმანია ყურადღებას გაამახვილებს საქართველოში არსებულ ხელსაყრელ ბიზნესგარემოსა და გამარტივებულ საგადასახადო და საბაჟო პროცედურებზე. ასევე, დედაქალაქში დაგეგმილ და მიმდინარე პროექტებზე. თბილისის მერი ისაუბრებს ევროპასთან ასოცირების ხელშეკრულებასა და ევროკავშირთან ღრმა და ყოვლისმომცველი თავისუფალი სავაჭრო სივრცის შეთანხმების მნიშვნელობის შესახებ.
“საკმაოდ საინტერესო შეხვედრები გაიმართება თელავივსა და იერუსალიმში. ასევე, ჩატარდება ბიზნესფორუმი, საუბარი იქნება თბილისში საინვესტიციო შესაძლებლობებზე. განვიხილავთ იმ პროექტებს, რომლებზეც ბოლო თვეების განმავლობაში მიმდინარეობდა მოლაპარაკება. შევხვდებით პარლამენტის თავმჯდომარის მოადგილეს. გარდა ამისა, თელავივის უნივერსიტეტში წავიკითხავ საჯარო ლექციას, სადაც საუბარი იქნება საინვესტიციო საკითხებსა და შესაძლებლობებზე საქართველოს დედაქალაქში”, – განაცხადა დავით ნარმანიამ.
თბილისის მერი ისრაელში ვიზიტს 18 აგვისტოს დაასრულებს.
Discussion about this post