სიმსივნური დაავადებების ადრეულ ეტაპზე დიაგნოსტიკა გახდება შესაძლებელი

საქართველოში სამეცნიერო ვიზიტით  იმყოფებიან სან დიეგოს სახელმწიფო უნივერსიტეტის პროფესორები. მათ შორისაა მეცნიერებათა დოქტორი ვილიამ (ბილ) ტონგი. პროფესორმა ტონგმა აღმოაჩინა ლაზერული ტექნოლოგიები რომლის მეშვეობითაც შესაძლებელი ხდება ძალიან მცირედი კონცენტრაციის მქონე ქიმიური ელემენტების გამოვლენა. ეს ტექნოლოგიები შესაძლებელს გახდის ალცჰეიმერის, სიმსივნური და სხვა დაავადებების ადრეულ ეტაპზე დიაგნოსტიკას და საგრძნობლად ზრდის მათი განკურნების შანსს. პროფესორი ტონგი და სან დიეგოს სახელმწიფო უნივერსიტეტის სხვა პროფესორები, თბილისში მიმდინარე STEM აკადემიის ფარგლებში, ლექციებს წაუკითხავენ სან დიეგოს სახელმწიფო უნივერსიტეტი – საქართველოს სტუდენტებს. STEM აკადემიის მიზანია სტუდენტები მოამზადოს სასწავლო წლის წარმატებულად დაწყებისთვის. მათ ჩაუტარდებათ ლექციები და საორიენტაციო სესიები. გაეცნობიან ქიმიის, ბიოლოგიის, ფიზიკის, მათემატიკის და ინჟინერიის სფეროში არსებულ უახლეს აღმოჩენებს, აშშ-ის უმაღლესი განათლების  სისტემას, საერთაშორისო აკრედიტაციის მნიშვნელობას და სხვა საინტერესო თემებს. პროფესორები გაუზიარებენ საკუთარი კარიერული წინსვლის გამოცდილებას და აუხსნიან თუ რამდენად მჭიდროდაა დაკავშირებული STEM ანუ ტექნოლოგიური და საინჟინრო დარგები და ქვეყნის ეკონომიკისა და ბიზნესის განვითარება. ცნობისთვის: სან დიეგოს სახელმწიფო უნივერსიტეტი (SDSU), ათასწლეულის გამოწვევის ფონდი – საქართველოს უმაღლესი განათლების კომპონენტის ფარგლებში, საქართველოში ახორციელებს მაღალი ხარისხის, საერთაშორისო აკრედიტაციის მქონე (ABET, ACS, WASC) საბაკალავრო პროგრამებს საინჟინრო და ტექნოლოგიურ (STEM) დარგებში. კურსდამთავრებულები მიიღებენ ამერიკულ დიპლომს. აღნიშნული პროგრამები ხელს შეუწყობს საქართველოში საბუნებისმეტყველო და ტექნოლოგიური დარგების განვითარებასა და ქვეყანაში მაღალკვალიფიციური სამუშაო ძალის მომზადებას. პროექტი ხორციელდება აშშ-ის ათასწლეულის გამოწვევის კორპორაციის (MCC) მეორე კომპაქტის ფინანსური მხარდაჭერით.