შემოსავლების სამსახურის საბაჟო გამშვებ პუნქტს „ყაზბეგი“ ჩინეთის სახალხო რესპუბლიკის საგანგებო და სრულუფლებიანი ელჩი საქართველოში იუე ბინი ეწვია.
შემოსავლები სამსახურის ინფორმაციით, ელჩმა დაათვალიერა ჩინური კომპანია „ნუკტეკის“ წარმოების ბარგისა და ადამიანის სხეულის სკანერები და აღნიშნა საბაჟო კონტროლის პროცესში მსოფლიოში ფართოდ აპრობირებული გარეგნული დათვალიერების თანამედროვე ტექნიკური საშუალებების მნიშვნელობა როგორც კანონდარღვევების წინააღმდეგ ბრძოლის, ასევე კანონიერი ვაჭრობის ხელშეწყობის სფეროში.
იუე ბინმა განაცხადა, რომ ჩინურმა მხარემ მხედველობაში მიიღო საქართველოს ფინანსთა მინისტრის, ნოდარ ხადურის თხოვნა და, გაისად, ჩინეთის სახალხო რესპუბლიკა საქართველოს საბაჟოს უსასყიდლოდ გადმოსცემს სტაციონარული რენტგენოინსპექციის ახალ სისტემას, დარიალის ხეობაში მომხდარი სტიქიის შედეგად დაზიანებული რენტგენოინსპექციის სისტემის ნაცვლად.
შემოსავლების სამსახურის წარმომადგენლებმა ელჩს გააცნეს ასევე საქართველოს საბაჟო ადმინისტრაციაში გამოყენებული საავტომობილო, სარკინიგზო, ბარგისა და ხელბარგის, ადამიანის სხეულის რენტგენოინსპექციის სისტემები, ასევე დაათვალიერებინეს საქართველოსა და რუსეთის ფედერაციის საბაჟო გამშვებ პუნქტებს შორის არსებული ტერიტორია, სადაც რამდენიმე ათეული სატვირთო ავტომანქანა ელოდებოდა რუსეთის ფედერაციის ტერიტორიაზე შესვლას.
ელჩმა დადებითად შეაფასა საქართველოს საბაჟო ორგანოს ეფექტური და სწრაფი მუშაობა.
