გაძვირდა თუ არა სწავლის საფასური კერძო სკოლებში?

ის, რომ ყველა მშობელი განსაკუთრებით ზრუნავს შვილის განათლებაზე ამაზე აღარ დავიწყებ საუბარს. ბავშვის სწავლა-განათლებასთან ზიარება სკოლის ასაკიდან იწყება, შესაბამისად სკოლის შერჩევა ყოველთვის დიდი ფიქრის საგანია…. დღეს თბილისში უამრავი კერძო სკოლები სოკოებივით მომრავლდა, სახელების, მათი გამორჩეული პირობების და ფასების სიმრავლეც თვალში საცემია….

რა ღირს კერძო სკოლებში სწავლა? გაძვირდა თუ არა წელს სწავლის საფასური? რომელი სკოლა რა უპირატესობით გამოირჩევა, აღნიშნულ საკითხებზე The Tbilisi Times 5 კერძო სკოლა გამოკითხა.

შედეგები კი, ასე გამოიყირება:

თბილისის „მწვანე სკოლა“

„სწავლის საფასური ჩვენთან 3900 ლარია, ხოლო ძველი მოსწავლეებისთვის ფასი იგივე –  3500 ლარი დარჩა. ამ საფასურში შედის კვება და სხვადასხვა სახის ღონისძიება.

რაც შეეხება პრიორიტეტს ჩვენი სკოლა გამოირჩევა კარგი კადრებით, ინდივიდუალური პროგრამითა და უფასო კლუბებით მაგ: სკოლის რადიო და ა.შ.“

ბრიტანული ცენტრის „წმინდა ნიკოლოზის სკოლა“

„ჩვენი სკოლის წლიური გადასახადია 5500 ლარია, საფასური არ გაზრდილა. თანხაში შედის კვება და კლუბური აქტივობები.

სხვა კერძო სკოლებისგან განვსხვავებით, ჩვენთან ისწავლება   გაძლიერებული ინგლისური, ასევე  გვყავს უცხოენოვანი პედაგოგები.  გვაქვს  შიდა აუზები, სადაც ბავშვები სწავლობენ ცურვას.“

სკოლა „ფენიქსი“

„სწავლის საფასური არ გაძვირებულა გადასახადის ოდენობა კლასების მიხედვით განსხვავდება. მაგ: მე-10 კლასი 3500 ლარი ღირს.

ჩვენს სკოლაში  ბავშვები ემზადებიან სააბიტურიენტო გამოცდებისთვის,  უტარდებათ ინგლისური კვირაში 4-5-ჯერ. ასევე გვაქვს ცალკე ინგლისურის ცენტრი. ჩვენი გარანტია კი ისაა, რომ ბავშვებს სხვაგან  მომზადება აღარ დასჭირდებათ. აქ ძალიან ოჯახური სიტუაციაა.“

ეროვნული სკოლა „ლიდერი“

„გაძვირდა თუ არა სწავლის საფასური ეს ინფორმაცია კონფიდენციალურია. სწავლის ფასი განისაზღვრება კლასების მიხედვით და იწყება 2500 ლარით.

სკოლის პრიორიტეტი ისაა, რომ კლასში გვყავს 12 ბავშვი. ვატარებთ გახანგრძლივებულ გაკვეთილებს, ისე, რომ ბავშვებს მომზადება აღარ დაჭირდეთ, ისინი ავტომატურად ხდებიან სტუდენტები და იღებენ  გრანტსაც.“

კერძო მრავალპროფილიანი სკოლა „ივერია“

„ჩვენი სკოლის საფასური შეადგენს წლიურ გადასახადს 1400 ლარს.   გვაქვს ასევე ოჯახიდან მეორე ბავშვზე 15%-იანი ფასდაკლება. სწავლის საფასურში შედის სპორტი ხელოვნება. მეტყველების გაკვეთილები მაღალ კლასებში.

სკოლა „ივერია“ გამოირჩევა სპეციალისტებით, ასევე გვახასიათებს გუნდური მუშაობა. ჩვენთან ისწავლება ხატწერა 5-6 კლასებში, ასევე მაღალი კლასის მოსწავლეები აკეთებენ ხატებს.“

 მოამზადა

სალომე აფხაზაშვილმა