12 სექტემბერს კახეთის გზატკეცილზე, საქართველოში ყველაზე დიდი სავაჭრო-გასართობი ცენტრი გაიხსნა.
ცენტრის გახსნა, ჯერ კიდევ, ზაფხულის მიწურულს დაანონსდა და საზოგადოებაც დიდი ინტერესით ელოდა თუ, როდის დასრულდებოდა ეს მასშტაბური პროექტი.
სავაჭრო ცენტრი „ისთ ფოინთი“ საზეიმოდ საქართველოს ვიცე პრემიერმა, ენერგეტიკის მინისტრმა, კახა კალაძემ და თბილისის ვიცე – მერმა ლაშა აბაშიძემ გახსნეს. გახსნის ცერემონიალს, დაახლოებით, 35 ათასამდე ადამიანი ესწრებოდა.
„ისთ-ფოინთის“, რომელიც 31 ჰექტარზეა განთავსებული, საინვესტიციო ღირებულება 100 მილიონ აშშ დოლარზე მეტია.
როგორც ცნობილია ობიექტზე განთავსებულია მაღაზიები, კაფეები, რესტორნები და სხვადასხვა გასართობი საშუალება. ამასთანავე, კომპლექსი 3 ათასამდე ახალ სამუშაო ადგილს ითვალისწინებს.
ახალი სავაჭრო ქალაქის დაარსების ისტორიის, ძირითადი უპირატესობების, ტრანსპორტთან დაკავშირებული კითხვებისა და სხვა სიახლეების შესახებ „თბილისი თაიმსს“ „ისთ ფოინთის“ მარკეტინგის დირექტორი, თეა ლომინაძე ესაუბრა.
რას წარმოადგენს ახალი სავაჭრო ცენტრი „ისთ–ფოინთი“ და როგორია მისი დაარსების ისტორია?
– პროექტის ისტორია დაიწყო 4 წლის წინ. ბაზარი საშუალებას იძლეოდა, რომ შექმნილიყო ახალი სავაჭრო ცენტრი. ჩატარდა კვლევა, რომლის შედეგადაც გაირკვა, რომ ქართველები უპირატესობას ღია სივრცეში, ეგრეთ წოდებულ „Street Style Shopping“–ს ანიჭებენ.
სწორედ ამიტომ გაჩნდა იდეა, შექმნილიყო ღია სივრცის ტიპის სავაჭრო ცენტრი.
არქიტექტურულ პროექტზე ცნობილმა ებრაულმა კომპანიამ MYS იმუშავა, რომლის აშენებულიცაა თანამედროვე თელავივის დიდი ნაწილი.
85,000 მ2-ზე განლაგებულ საერთაშორისო სტანდარტების მქონე კომპლექსში განთავსებულია „კავეას“ ქსელის კინოთეატრი “CAVEA IMAX”.
“CAVEA IMAX” რეგიონში პირველი IMAX ტექნოლოგიის 10 დარბაზიანი კინოთეატრია; სავაჭრო ცენტრში მომხარებელს ელოდება 12 ხაზიანი პროფესიონალური ბოულინგი კონცეპტუალური კაფე&რესტორნით, ასევე რეგიონში ყველაზე დიდი “ზარა”, “მანგო”, “მასიმოდუტი”, “სტრადივარიუსი” და “ბერშკა”. აქვეა პირველი DIY (Do It Yourself) და ჰიპერმარკეტი “დომინო”, რომელიც მომხმარებელს სთავაზობს ყველაფერს სახლისა და რემონტისათვის.
„ისთ ფოინთში კვების ისეთი საერთაშორისო ბრენდებია, როგორიც არის “მაკდონალდსი”, “ვენდისი”, “დანკინდონატსი”. სიახლეა ის, რომ იხსნება მსოფლიოში ცნობილი ბრენდების, “დეფაქტო”, “გლორიაჯინსისა” და “ინგლოტის” პირველი მაღაზიები საქართველოში.
საერთო ჯამში “ისთ ფოინთი” მომხმარებელს 150-ზე მეტ ტანსაცმლის, ფეხსაცმლისა და აქსესუარების მაღაზიას და სწრაფი კვებისა და რესტორნების ფართო არჩევანს სთავაზობს.
რა არის ის ძირითადი უპირატესობები,რითიც მან მომხარებელი უნდა მიიზიდოს?
– საინტერესო არქიტექტურა, კარგი ბრენდმიქსი, ყველაზე დიდი „DIY“ (Do it Yourself), სამშენებლო ჰიპერმარკეტი „დომინო“, ბოულინგი, როგორც აღვნიშნე 150-ზე მეტი ტანსაცმლის, ფეხსაცმლისა და აქსესუარების მაღაზია. ყველასათვის საყვარელი კვების ობიექტები, ეს კიდევ არასრული ჩამონათვალია, რომელიც დღეს ჩვენს პროექტს გამორჩეულს და მომხმარებლისათვის საინტერესოს და მიმზიდველს ხდის.
რაც მთავარია, „ისთ ფოინთი“ ჩვენს ქალაქში ქმნის განწყობას, რომელიც სტუმრებს მისცემს გართობის, დასვენებისა და შოპინგის საშუალებას.
გარდა მაღაზიების და კვების ობიექტებისა, კიდევ რა სახის მომსახურებას სთავაზობს სავაჭრო ცენტრი მოსახლეობას?
– ჩვენთან მოსულ სტუმრებს დახვდებათ კინოთეატრ „კავეას“ 10 კინოდარბაზი და IMAX ტექნოლოგიის კინო, რომელიც არა მხოლოდ საქართველოში, არამედ რეგიონში პირველი იქნება, პროფესიონალური ბოულინგი კაფე-რესტორნითა და საბილიარდოთი. წლის ბოლომდე გაიხსნება ბავშვთა გასართობი ცენტრი „ფოკუს–მოკუსი“, რომელის ავტორიც ამ მიმართულებით მომუშავე, მსოფლიოში წამყვანი ბელგიური კომპანია KCC-ა. ამ კომპანიას ეკუთვნის მსოფლიოში მრავალი ცნობილი პროექტი, მათ შორის, დუბაიში ყველაზე პოპულარულ სავაჭრო ცენტრებში და ბავშვთა გასართობი კომპლექსები.
რამდენად ხელმისაწვდომია დედაქალაქის ნებისმიერი წერტილიდან მგზავრობა „ისთ–ფოინთამდე“ და რაიმე სირთულეებთან ხომ არ არის იგი დაკავშირებული?
– ქალაქის ცენტრიდან „ისთ ფოინთამდე“ დრო 12 წუთი ან 4 სიმღერაა.
ასევე, დადის არსებული ტრანპორტის ხაზები და დამატებით, “ისთ ფოინთ”-ის მიერ დანიშნულია უფასო ტრანსპორტი, რომელიც ყოველდღე, 15 წუთის განრიგით სამგორის მეტროდან (ზედა გასასვლელი) – „ისთ ფოინთის“ მიმართულებით იმოძრავებს.
ასევე უახლოეს მომავალში იგეგმება ქალაქ რუსთავიდან – “ისთ ფოინთის” მიმართულებით სპეციალური მიკროავტობუსის დამატება.
როგორც ვიცით, სავაჭრო ცენტრი 12 სექტემბერს გაიხსნა, როგორ შეაფასებთ გახსნის ცერემონიალს და პირველ სამუშაო რამდენიმე დღეს?
– სავაჭრო ცენტრის გახსნის წარმატება იზომება 2 კრიტერიუმით: ხალხის რაოდენობით, ეგრეთ წოდებული traffic-ითა და მაღაზიებში გაყიდული საქონლის ოდენობით.
უნდა ითქვას,რომ ჩვენ შემთხვევაში ორივე კრიტერიუმის გათვალისწინებით, გახსნამ წარმატებით ჩაიარა და ყოველგვარ მოლოდინს გადააჭარბა. 30-35 ათასი ადამიანი ესწრებოდა გახსნის ცერემონიალს.
სამუშაო რეჟიმი წარმატებით მიმდინარეობს, სწორედ ისე, როგორც იყო დაგეგმილი და რა მოლოდინებიც ჰქონდა ჩვენს დამქირავებლებსა და ცენტრის მენეჯმენტს.
როგორია სავაჭრო ცენტრის სოციალური პასუხისმგებლობა?
– „ისთ ფოინთის“ მთელ ტერიტორიაზე შექმინილია სპეციალური ინფრასტრუქტურა შეზღუდული შესაძლებლობის მქონე პირთათვის გადასაადგილებლად. ამავდროულად, შექმნილია მათთვის სამუშაო ადგილებიც.
ასევე „ისთ ფოინთი“ მალე დააანონსებს სოციალური პასუხისმგებლობის მიმართულებას. ამ ეტაპზე ვმუშაობთ, რამდენიმე მიმართულებით და ძალიან მალე გავაკეთებთ განაცხადს.
დიდი მნიშვნელობას ვანიჭებთ რეკრეაციულიზონების განვითარებას. იტალიელმა სპეციალისტებმა იმუშავეს ამ საკითხზე. ტერიტორიის დიდი ნაწილი გამწვანებულია, და ვაპირებთ კიდევ დამატებით გამწვანებას. ამით ვფიქრობთ, რომ დიდი წვლილი შეგვაქვს გარემოს ეკოლოგიურად გაუმჯობესებაში.
რა სიახლეებს შესთავაზებს სავაჭრო ცენტრი მომხარებლებს მომავალში?
– გვექნება რამდენიმე სიახლე, პირველ რიგში, წლის ბოლომდე „ისთ ფოინთს“ დაემატება ჰიპერმატკეტი „კარფური“.
ასევე რეგიონში უდიდესი ელექტროტექნიკის მაღაზია, სადაც ყველა ტექნიკის ბრენდი ერთ სივრცეში იქნება გაერთიანებული.
ვგეგმავთ ახალი თანამედროვე იტალიური ავეჯის ბრენდის დამატებას. მაღაზია 3.500 კვადრატულ მეტრზე განთავსდება. აქვე, როგორც უკვე გაგაცანით, გაიხსნება ბავშვთა გასართობი ცენტრი „ფოკუს-მოკუსი“, რომელსაც ანალოგი მთელ რეგიონშიც არ აქვს.
ესაუბრა
ნათია კეკენაძე
