შავი ზღვის ვაჭრობისა და განვითარების ბანკსა (BSTDB) და ქეი-ეს-ბი ბანკს შორის ხელი მოეწერა საკრედიტო ხელშეკრულებას. BSTDB-მ ქეი-ეს-ბი ბანკისთვის 5 მილიონი აშშ დოლარის ოდენობის სესხი გამოყო.
როგორც “თბილისი თაიმსს” ბანკიდან აცნობეს, მოზიდული რესურსით ქეი-ეს-ბი ბანკი მცირე და საშუალო ბიზნესის ფინანსირების გაფართოებას გეგმავს, რაც საბოლოო ჯამში, ქვეყანაში ახალი სამუშაო ადგილების წარმოქმნასა და ეკონომიკურ განვითარებას შეუწყობს ხელს.
„შავი ზღვის ვაჭრობისა და განვითარების ბანკი (BSTDB) ძლიერი საერთაშორისო ფინანსური ინსტიტუტია, რომელთანაც ქეი-ეს-ბი ბანკი წარმატებით თანამშრომლობს შავი ზღვის რეგიონის ქვეყნებთან ვაჭრობის ხელშეწყობის პროგრამის ფარგლებში. მცირე და საშუალო ბიზნესის დაკრედიტებისთვის ხელშეკრულების გაფორმება ურთიერთობის ახალი ეტაპია, რომელიც ამ სეგმენტის დაფინანსებაში პოზიციის გაფართოების საშუალებას მოგვცემს. მოხარულები ვართ, რომ მივაღწიეთ ამ შეთანხმებას და იმედი გვაქვს, რომ მომავალში ჩვენ შორის საქმიანი ურთიერთობა კიდევ უფრო გაღრმავდება,“ – აცხადებს ქეი-ეს-ბი ბანკის გენერალური დირექტორი – თეა ლორთქიფანიძე.
„მოხარულები ვართ, რომ BSTDB-სა და ქეი-ეს-ბი ბანკს შორის წარმატებით გრძელდება საქმიანი ურთიერთობა, რომელსაც საფუძველი 2012 წელს ჩაეყარა. ეკონომიკის საკვანძო ბიზნესსეგმენტის – მცირე და საშუალო ბიზნესის მხარდაჭერა და განვითარება BSTDB-ის სტრატეგიული პრიორიტეტია. დარწმუნებულები ვართ, რომ ჩვენი პარტნიორობა ხელს შეუწყობს KSB ბანკს გაზარდოს დაფინანსების ხელმისაწვდომობა სამრეწველო, სასოფლო-სამეურნეო და მომსახურების სფეროსთან დაკავშირებული ბიზნესისათვის და განავითაროს საქართველოს სავაჭრო ოპერაციები შავი ზღვის რეგიონში“ – განმარტავს BSTDB.
ცნობისთვის, ქეი-ეს-ბი ბანკი 16 წელია, რაც ქართულ საბანკო ბაზარზე წარმატებით ოპერირებს და აქტიურად უწყობს ხელს მცირე და საშუალო ბიზნესის განვითარებას. იგი შედის მძლავრ არაბულ საინვესტიციო კომპანია „დაბი ჯგუფში“, რომელიც საერთაშორისო ბაზარზე მრავალპროფილურ ბიზნესს ფლობს: ტურიზმის ინდუსტრია, უძრავი ქონება, დეველოპმენტი, წარმოება, საბნაკო და ფინანსური მომსახურება, საზღვაო ჭაბურღილები და ა.შ. „დაბი ჯგუფის“ სიძლიერე მნიშვნელოვნად განსაზღვრავს ქეი-ეს-ბი ბანკის სტაბილურად წარმატებულ და მუმდმივად განვითარებად საქმიანობას ქართულ ბაზარზე.
შავი ზღვის ვაჭრობისა და განვითარების ბანკი შავი ზღვის რეგიონის 11 ქვეყნის მიერ არის დაარსებული და მისი მიზანია, ხელი შეუწყოს რეგიონში ეკონომიკური ვითარების გაუმჯობესებას. BSTDB-ის ძირითადი საქმიანობა წევრ ქვეყნებს შორის სავაჭრო, ფინანსური, ინფრასტრუქტურული და მჭიდრო ეკონომიკური კავშირების განვითარებაა. BSTDB თავის წევრებს სთავაზობს სესხებს, საკრედიტო ხაზს, საბანკო გარანტიებსა და სავაჭრო ოპერაციების დაფინანსებას როგორც საჯარო, ასევე – კერძო სექტორში. ამ დროისათვის BSTDB-ს 3.45 მილიარდი ევროს ღირებულების პროექტები აქვს განხორციელებული. BSTDB-ის Standard and Poor-ის “A-” და Moody-ს “A3” შეფასება აქვს.
