ვიცე-პრემეირი, საქართველოს საგარეო საქმეთა მინისტრი გიორგი კვირიკაშვილი გაერთიანებული არაბთა ემირატების საგარეო საქმეთა მინისტრს, შეიხ აბდულა ბინ ზაიედ ან ნაჰიანს შეხვდა.
მინისტრებმა ისაუბრეს ბოლო პერიოდში ორ ქვეყანას შორის მზარდ ეკონომიკურ თანამშრომლობაზე, ხაზი გაესვა ამ თვალსაზრისით არსებულ დამატებით შესაძლებლობებს, მათ შორის გაერთიანებული საემიროების მხრიდან გამოითქვა სურვილი პირდაპირი რეისები შესრულდეს თბილისისა და ბათუმის მიმართულებით.
მხარეებმა განიხილეს ორ ქვეყანას შორის არსებული ეკონომიკური კავშირების ხელშეწყობისთვის გაერთიანებულ ემირატებსა და საქართველოს შორის ინვესტიციების დაცვისა და ორმაგი დაბეგვრის თავიდან აცილების შესახებ შეთანხმებების ხელმოწერის შესაძლებლობა.
შეხვედრა გაერო-ს გენერალური ასამბლეის 70-ე სესის ფარგლებში შედგა, სადაც საქართველოს საგარეო უწყების ხელმძღვანელი სესიის პარალელურად კოლეგა მინისტრებს ხვდება.
2015 წლის 26 სექტემბერს გიორგი კვირიკაშვილი ასევე შეხვდა სომხეთის საგარეო საქმეთა მინისტრს ედვარდ ნალბანდიანს. მინისტრებმა გულთბილად ისაუბრეს ორი ქვეყნის ტრადიციულ მეგობრულ და კეთილმეზობლურ ურთიერთობაზე, მიმოიხილეს საქართველოსა და სომხეთს შორის თანამშრომლობის ყველა მნიშვნელოვანი სფერო.
ანგოლის საგარეო საქმეთა მინისტრმა ჟორჟი რებალუ ჩიკოტიმ , საქართველოს საგარეო საქმეთა მინისტრთან შეხვედრაზე განსაკუთრებით აღნიშნა საქართველოს ძალისხმევა ურთიერთობები განავითაროს აფრიკის ქვეყნებთან. მინისტრებმა მიმოიხილეს ორმხრივი ურთიერთობის სხვადასხვა საკითხები, განსაკუთრებით აღნიშნეს სექტორულ სფეროში თანამშრომლობის მზარდი შესაძლებლობა.
ვიცე-პრემიერი ასევე შეხვდა კოლეგას ავღანეთის რესპუბლიკიდან და სენტ-ლუსიადან.