თბილისიდან 180 კილომეტრში, რამდენიმე წელია, ლაშქრობისა და მთის მოყვარულებს, ტურისტული ბანაკი – „ზეთა“ მასპინძლობს.
ბანაკი ყაზბეგის რაიონის სოფელ ჯუთაში, ზღვის დონიდან 2300 მეტრ სიმაღლეზე მდებარეობს. ადგილზე შესაძლებელია გადაიხადოთ დაბადების დღე, ქორწილი, მოუწყოთ სიურპრიზი საყვარელ ადამიანს ან უბრალოდ, დაისვენოთ მშვიდ გარემოში და ისიამოვნოთ ბუნების ცქერით.
„ზეთა“ 2009 წელს გაიხსნა და დღემდე, როგორც ქართველი, ისე უცხოელი ტურისტებისთვის განსაკუთრებულ ადგილად რჩება. ყოველწლიურად, ბანაკში სტუმრების რაოდენობა იმატებს და მათი რიცხვი უკვე, რამდენიმე ათასს აღწევს.
სტუმრებს ადგილზე კარვები, კოტეჯები, ღამის გასათევი „ბურთები“, გემრიელი კერძები და ორიგინალური ინფრასტრუქტურა ხვდებათ, თუმცა ყველაზე მთავარი მათთვის მაინც ჭიუხებია,რომლის ძირშიც მდებარეობს სოფელი ჯუთა.
რას ნიშნავს სახელი „ზეთა“, როგორია მისი შექმნის ისტორია და რა სიახლეებია დაგეგმილი ტურისტულ ბანაკში? – სეზონის დასასრულს „თბილისი თაიმსს“ ამ დეტალებზე „ზეთას“ დამფუძნებელი და დირექტორი ანანო არაბული ესაუბრა.
როგორ შეიქმნა ტურისტული ბანაკი „ზეთა“ და რამდენი წელია, რაც ის არსებობს?
– „ზეთას“ შექმნის ისტორია, რა თქმა უნდა, უკავშირდება ყაზბეგს, სოფელ ჯუთას. მამა წარმოშობით ამ სოფლიდან არის და ზაფხულობით ყოველ წელს აქ ვისვენებდით. სოფელში არაფერი ხდებოდა, მხოლოდ რამდენიმე ტურისტი თუ გამოჩნდებოდა. წლების შემდეგ გადავწყვიტეთ მე და ჩემმა მეგობარმა, რომელიც აქტიური მთასვლელია, შეგვექმნა ტურისტული ბანაკი, შემდგომ გავხდით პარტნიორები და ამ პროექტზე მუშაობა დავიწყეთ.
ქრონოლოგიურად,რომ მივყვეთ ყველაფერი 2008 წელს დაიწყო და „ზეთა“ 2009 წელს გავხსენით, ბანაკი ტურისტებისთვის ღია მხოლოდ ერთი თვე იყო. სეზონის მიწურულს დაემთხვა გახსნა, თუმცა პირველივე თვეს ბევრი სტუმარი მივიღეთ. თავდაპირველად მხოლოდ კაფე და რამდენიმე კარავი გვქონდა, შემდგომ დროთაგანმავლობაში სხვა ინფრასტრუქტურაც მივამატეთ.
რას ნიშნავს სახელი „ზეთა“ და რატომ აარჩიეთ სწორედ ის ადგილმდებარეობა,სადაც დღესდღეობით, ბანაკი არსებობს?
– იმ ტერიტორიას, სადაც დღეს ჩვენი ბანაკი მდებარეობს ადრე „ზეთა მეიდანს“ – ანუ ზემო ადგილს ეძახდნენ. შესაბამისად, ჩვენ ეს სახელი შევკვეცეთ და დავტოვეთ მხოლოდ ზემო, ანუ “ზეთა“.
სახელიდან გამომდინარე, ტურისტული ბანაკი, სოფლის მოშორებით სწორედ შემაღლებულ ადგილას დგას. რატომ ეს ადგილმდებარეობა? – პირველ რიგში, იმიტომ რომ ძალიან ლამაზია ირგვლივ ყველაფერი, ისევე როგორც მთელს ყაზბეგში, თუმცა ჭიუხები, რომლითაც ყველა ინტერესდება “ზეთადან“ ყველაზე უკეთ ჩანს.
რას სთავაზობს ბანაკი ქართველ და უცხოელ ტურისტებს და რატომ უნდა აირჩიონ „ზეთა“ ლაშქრობის მოყვარულებმა?
– ცალსახად,რისი თქმაც შემიძლია, პირველ რიგში, არის ის რომ „ზეთა“ უბრალოდ განსაკუთრებული ადგილია. ესთეტიკური თვალსაზრისით ის ყველას ხიბლავს. შესაბამისად, ასეთ მშვენიერ ადგილას, სადაც ექსტრემალები, ლაშქრობის მოყვარულები თუ უბრალოდ სტუმრები ხშირად დადიან, ტურისტული ბანაკი განტვირთვის საშუალება ხდება. ჩვენ ვთავაზობთ მათ ელემენტარულ პირობებს, რომ დაიძინონ სუფთად, ისარგებლონ სველი წერტილებით, მიირთვან გემრიელი საჭმელი, მოწყდნენ ხმაურიან ქალაქს და იყვნენ მშვიდ გარემოში.
რა სახის მომსახურებას სთავაზობთ სტუმრებს და როგორია ფასები?
– ტურისტული ბანაკი „ზეთა“ სტუმრებს ღამის გასათავად სთავაზობს,როგორც კარვებს, ისე კეთილმოწყობილ კოტეჯებს. როგორც უკვე ვთქვი, თავიდან მხოლოდ კარვები გვქონდა, მაგრამ შემდგომ დავამატეთ ოთახებიც, გავაფართოვეთ კაფე, შევმატეთ დეკორაციული ელემენტები. გარდა ამისა, გვყავს გიდი და ტურისტებს ვთავაზობთ სხვადასხვა ტურს თუშეთამდე, ჭიუხებამდე, შესაძლებელია ცხენების ქირაობაც. ერთი ღამის გატარება ბანაკში 17 ლარიდან 45 ლარამდე მერყეობს.
საშუალოდ ერთი სეზონის განმავლობაში, რამდენი სტუმარი ჰყავს ტურისტულ ბანაკს და თუ გახსენდებათ განსაკუთრებული ან საინტერესო შემთხვევები, რომელიც სტუმრებთან არის დაკავშირებული?
– მაგალითისთვის, როდესაც თავდაპირველად „ზეთა“ გაიხსნა 2009 წელს, ვიმუშავეთ მხოლოდ ერთი თვე, მთელი აგვისტო და უკვე 200 სტუმარი გვყავდა. წლები გადის და რა თქმა უნდა, უფროდაუფრო იმატებს სტუმრების რაოდენობა. ამ სეზონზე „ზეთას“ 8000 სტუმარი ეწვია, ტურისტები როგორც ქართველები, ისე უცხოელები არიან, განსაკუთრებით ევროპის ქვეყნებიდან გვსტუმრობენ. სეზონს ვამთავრებთ 30 სექტემბერს.
რაც შეეხება საინტერესო და განსაკუთრებულ შემთხვევებს, ძალიან ბევრი ამბის გახსენება შემიძლია. მაგალითად, ხვალ რუსი წყვილის ქორწილია და ამ წუთებში მზადების პროცესში ვართ, ვბერავთ ბუშტებს, ვამზადებთ დეკორაციებს და ა.შ. ამ სეზონზე უკვე 5-მა წყვილმა იქორწინა „ზეთაზე“. დაბადების დღეები და სხვა წვეულებები კი ძალიან ხშირია.
როგორ შეაჯამებთ ამ სეზონს და თუ გეგმავთ სიახლეებს მომავალი სეზონისთვის?
– ძალიან კარგი და ნაყოფიერი სეზონი გვქონდა, რაც პირველ რიგში, ჩვენი სტუმრებისა და პერსონალის დამსახურებაა.
ყოველწლიურად სტუმართა რიცხვი იმატებს და ჩვენც ვცდილობთ, რომ არსებულ მოთხოვნებს ვუპასუხოთ, ვგეგმავთ გაფართოებას, რესტორნისთვის ახალი შენობის აშენებას, რომელსაც ექნება თავისი ბარი, დიდი სამზარეულო და საკონფერენციო სივრცე. შესაბამისად მომავალი სეზონისთვის ბევრი სიახლე გვექნება.
ესაუბრა
ნათია კეკენაძე