ლეიკემიით დაავადებული კიდევ ერთი მოზარდის მკურნალობა ჯანდაცვის სამინისტრომ სრულად დააფინანსა

ჯანდაცვის სამინისტრო ლეიკემიით დაავადებული კიდევ ერთი მოზარდის, 13 წლის გიორგი გაბედავას მკურნალობასაც დააფინანსებს.

ამის შესახებ ჯანდაცვის მინისტრმა, დავით სერგეენკომ დღეს პარლამენტის შენობის წინ “დიმიტრი ცინცაძის სახელობის ფონდის” მიერ ორგანიზებულ საპროტესტო აქციაზე მისვლისას განაცხადა.

მისივე თქმით, ლეიკემიით დაავადებული 12 წლის მირზა ცეცხლაძის მკურნალობის კურსს იტალიაში ჯანდაცვის სამინისტრო სრულად დააფინანსებს. მისი მკურნალობის თანხა “ბავშვათა ონკოჰემატოლოგიური ფონდიდან” გადაირიცხება, რომლის ბიუჯეტი 1 300 000 ლარს შეადგენს.

სერგეენკოს განცხადებით, ჯანდაცვის სამინისტრო ანალოგიურად მოიქცევა 13 წლის გიორგი გაბედავას შემთხვევაში, რომელსაც ასევე გადაუდებელი დახმარება ესაჭიროება. მინისტრის თქმით, მის დაფინანსებაზე მუშაობა უკვე დაწყებულია.

როგორც სერგეენკომ აღნიშნა, სამინისტროს დიდი ხნის წინ აქვს ზრუნვა დაწყებული დარგზე, რომელსაც ბავშვთა ონკოჰემატოლოგია ჰქვია.

“ჩვენ მარტო მირზაზე არ ვმუშაობთ, ჩვენ ვმუშაობთ იმისთვის, რომ ყველა ბავშვს ვისაც ონკოჰემატოლოგიური პრობლემა აქვს, ჰქონდეს ეფექტური გადაუდებელი და დაუყოვნებლივი დახმარება”, – აღნიშნა მინისტრმა.

მინისტრის ამ განცხადებას, აქციის მონაწილეები, ჟურნალისტები და ცნობილი სახეები ოვაციებით შეხვდნენ. მათ მინისტრს მადლობა გადაუხადეს.
აქციის მონაწილეების თქმით, მირზა ცეცხლაძე სამკურნალოდ იტალიაში რამდენიმე დღეში გაემგზავრება.

პარლამენტის შენობის წინ “დიმიტრი ცინცაძის სახელობის ფონდის” ორგანიზებით საპროტესტო აქცია გაიმართა, რომლის მონაწილეებიც ხელისუფლებას ლეიკემიით დაავადებული ბავშვების დახმარებისკენ მოუწოდებდნენ.

მათ ჰქონდათ პლაკატი წარწერით – “შეასრულეთ მოვალეობა – გადაარჩინეთ ბავშვების სიცოცხლე”.

25.06.13