ნატო-ს გენერალური მდივნის, იენს სტოლტენბერგის განცხადებით, რეფორმებში, პროგრესის მხრივ, საქართველო სწორ გზაზე დგას.
ამის შესახებ გენ. მდივანმა 8 ოქტომბერს განაცხადა, მას შემდეგ, რაც ნატო-ს თავდაცვის მინისტრებმა საქართველოს თავდაცვის მინისტრ თინა ხიდაშელთან თანამშრომლობის გაღრმავების საკითხები განიხილეს.
„საქართველო ჩვენი ერთ-ერთი უახლოესი პარტნიორია და ჩვენ სტაბილურად მივდივართ დაახლოებისკენ“, – აღნიშნა სტოლტენბერგმა.
ნატო-ს ოფიციალურ ვებგვერდზე განთავსებულ ინფორმაციაში ასევე აღნიშნულია, რომ ნატო-საქართველოს კომისიის სხდომის წევრები მიესალმნენ იმ პროგრესს, რომელიც მიღწეულია ნატო-საქართველოს პარტნიორობის გაძლიერების მხრივ. სტოლტენბერგმა აღნიშნა, რომ დახმარების არსებითი პაკეტი, რომელიც ერთი წლის წინ შეთანხმდა, ახლა უკვე რეალობად იქცა.
„ჩვენ ავაგეთ პოლიტიკური კონსულტაციები და პრაქტიკული თანამშრომლობა. მაგალითად ნატო-მ და საქართველომ ივნისში ერთობლივი წვრთნები ჩაატარეს საქართველოში. ასევე, აგვისტოში შედგა ერთობლივი სწავლებისა და შეფასების ცენტრის ინაუგურაცია თბილისში“, – განაცხადა სტოლტენბერგმა.
გენერალურმა მდივანმა კიდევ ერთხელ დაადასტურა ნატო-ს მხარდაჭერა საქართველოს ევრო-ატლანტიკურ სივრცეში ინტეგრაციის მიმართ, მაგრამ ასევე აღნიშნა, რომ საჭიროა ძირითადი მნიშვნელობის რეფორმებში პროგრესის მიღწევა, მათ შორის, კანონმდებლობის კუთხით.
მან რუსეთს კიდევ ერთხელ მოუწოდა, პატივი სცეს საქართველოს ტერიტორიულ მთლიანობასა და სუვერენიტეტს და უკან წაიღოს აფხაზეთისა და ცხინვალის რეგიონების დამოუკიდებელ სახელმწიფოებად აღიარება.
