გლდანში, სპეციალური საგანმანათლებლო საჭიროების მქონე მოსწავლეებისთვის შექმნილ #200 საჯარო სკოლის სარეაბილიტაციო სამუშაოებზე 1,100 მლნ ლარი დაიხარჯა.
განათლების მინისტრმა თამარ სანიკიძემ და შრომის, ჯანმრთელობის და სოციალური უზრუნველყოფის მინისტრმა დავით სერგეენკომ, დღეს, ქერჩის ქუჩაზე ახლად რეაბილიტირებული მე-200 საჯარო სკოლა დაათვალიერეს, სადაც სამინისტროს მიერ სპეციალური საგანმანათლებლო საჭიროების მქონე მოსწავლეებისთვის თანამედროვე სასწავლო გარემოა უზრუნველყოფილი.
მინისტრებმა მე-200 სკოლაში რეაბილიტირებული მოსწავლეთა საცხოვრებელი კორპუსი და კვების ბლოკი დაათვალიერეს.
სკოლის დირექტორის მარინა უჯმაჯურიძის თქმით, სრული რეაბილიტაცია საცხოვრებელ კორპუსსა და კვების ბლოკს ჩაუტარდა. მოეწყო თერაპიული მუშაობის ოთახები, სააღმზრდელო ჯგუფები, ექიმის კაბინეტი, საძინებლები, მშობელთა მისაღები, ადაპტირებული სველი წერტილები, ასევე პანდუსები გაკეთდა სკოლაში, საცხოვრებელ კორპუსსა და კვების ბლოკში. მოეწყო ეზო, დაიგო ასფალტის საფარი და გამწვანდა ტერიტორია.
მისივე თქმით, სამინისტრომ უკვე გამოაცხადა ტენდერი, რომლითაც კვების ბლოკისთვის სამზარეულოს ინვენტარის შეძენა მოხდება.
განათლებისა და ჯანდაცვის მინისტრებმა კმაყოფილება გამოთქვეს ჩატარებული სამუშაოების გამო და აღნიშნული კაბინეტები დაათვალიერეს.
“დღეს ყველანაირი პირობაა შექმნილი, რომ სრულფასოვანი მომსახურება შევთავაზოთ ამ ბავშვებს, თავისი გარემოთი, კვების ობიექტით. ჯანდაცვის სამინისტროსთან ერთად კვების ახალ სტანდარტზე მიდის მუშაობა, რომელიც არა მარტო ამ სკოლისთვის, ყველა ზოგადსაგანმანათლებლო დაწესებულებებისთვის იქნება სავალდებულო,” – განაცხადა თამარ სანიკიძემ.
სამინისტროს ინფორმაციით, სკოლა-პანსიონში სპეციალური საგანმანმანათლებლო საჭიროების მქონე 97 მოსწავლე სწავლობს, მათგან 65 პანსიონში ცხოვრობს. აღნიშნული საგანმანათლებლო დაწესებულება საჯარო სკოლად 2005 წლიდან ფუნქციონირებს, მანამდე იგი სპეცსკოლას წარმოადგენდა.
