ვიცე-პრემიერ კახა კალაძის განცხადებით, ტელეკომპანია „რუსთავი 2“-ის საქმეზე პრეზიდენტ გიორგი მარგველაშვილის დღევანდელ განცხადებას, ის გაეცნო. როგორც კალაძემ მთავრობის სხდომის დასრულების შემდეგ ჟურნალისტებს განუცხადა, მისთვის გაუგებარია, თუ რას ნიშნავს პრეზიდენტის განცხადებები.
„მე წავიკითხე პრეზიდენტის განცხადებები. მინდა გითხრათ, რომ აშკარად ჩანს მისი მხრიდან ჩარევა, ზეწოლა მოსამართლის მიმართ, რადგან ის მოუწოდებს მოსამართლეს, რომ მიიღოს ნაჩქარევი და ხისტი გადაწყვეტილება. თუ რას ნიშნავს ეს, ჩემთვის გაუგებარია. მე მოვუწოდებ პრეზიდენტ მარგველაშვილს, რომ განმარტებები გააკეთოს ამასთან დაკავშირებით, თუ რას ნიშნავს ეს. ეს არის პირდაპირი ზეწოლა და ჩარევა მოსამართლის საქმიანობაში. ჩვენ ამ დროის განმავლობაში ყოველთვის ვამბობდით, რომ ეს არის კერძო დავა 2 სუბიექტს შორის, თუმცა ბოლოდროინდელი მოვლენებიდან გამომდინარე, აშკარად იკვეთება, რომ ეს არის დავა ქიბარ ხალვაშს და „ნაციონალურ მოძრაობას – მიხეილ სააკაშვილს შორის. ამიტომ, მე, როგორც თანამდებობის პირი, თავს შევიკავებდი რაიმე კონკრეტული განცხადებების გაკეთებისგან და დაველოდოთ სასამართლოს გადაწყვეტილებას, რამეთუ, ჩემი განცხადება შეიძლება რომელიმე მხარის ზეწოლად იქნას გამოყენებული“, – განაცხადა კალაძემ.
პრეზიდენტ იორგი მარგველაშვილის განცხადებით, მთავრობის მეთაურის დღევანდელმა გამოსვლამ, მეტი დაძაბულობა შეიტანა, ისედაც რთულ ვითარებაში.
“ბოლო დღეებში განვითარებულმა მოვლენებმა მოახდინა პოლიტიკური კლიმატის ესკალაცია და შექმნა კონსტიტუციური წესრიგის დარღვევის და სამოქალაქო დაპირისპირების წინაპირობები. ქვეყნის კონსტიტუციის დაცვა ყველა მოქალაქის მოვალეობაა და პირველ რიგში, საქართველოს ხელისუფლების. სამწუხაროდ, მთავრობის მეთაურის დღევანდელმა გამოსვლამ, სიტუაციის განმუხტვის ნაცვლად, მეტი დაძაბულობა შეიტანა, ისედაც რთულ ვითარებაში. მოვუწოდებ ყველას, თავი შეიკავოს მძაფრი ნაბიჯებისგან და მოთოკოს ემოციები, გავუფრთხილდეთ სამოქალაქო მშვიდობას. მოვუწოდებ მოსამართლეს, არ მიიღოს ნაჩქარევი და ხისტი გადაწყვეტილება, რაც კიდევ უფრო დაძაბავს სიტუაციას”,- აღნიშნა მარგველაშვილმა.