საქართველოს თავდაცვის მინისტრის ინიციატივით, ქართული ჯარი საკვებად ადგილობრივი წარმოების პროდუქციის შეძენას იწყებს. თინა ხიდაშელის განცხადებით, ყველაფერი, რითაც ქართული ჯარი გამოიკვებება, იქნება ქართული, იმ პროდუქტების გამოკლებით, რომელიც არ იწარმოება საქართველოში. მისი თქმით, საქონლის ახალი ხორცის შესყიდვაზე „სახელმწიფო შესყიდვების შესახებ კანონით“ გათვალისწინებული ელექტრონული ტენდერი უკვე გამოცხადებულია.
თავდაცვის მინისტრი იმედოვნებს, რომ ბიზნესმენები ამ ინიციატივით დაინტერესდებიან და ტენდერში აქტიურად ჩაერთვებიან.
„ვინაიდან ჯარის ქართული პროდუქციით მომარაგების ინიციატივა თავისი შინაარსით უპრეცედენტოა, პირველ ეტაპზე თავდაცვის სამინისტრო საპილოტე რეჟიმში მხოლოდ საქონლის ხორცს შეისყიდის და ამ პროდუქტით თავდაპირველად აღმოსავლეთ-ოპერატიული სარდლობის სამხედრო ბაზები მომარაგდება. თავდაცვის სამინისტრო ყურადღებით დააკვირდება ამ პროცესში მეწარმეების აქტივობას, რის შემდეგაც, ყველა სამხედრო ბაზისთვის, ხორცთან ერთად, დაიგეგმება ადგილობრივი წარმოების სხვა პროდუქციის შეძენაც. ჯარის კვების ქართულ პროდუქციაზე გადასვლის პროექტი წლის ბოლომდე საპილოტე რეჟიმში განხორციელდება. სამხედრო შენაერთების ქართულ პროდუქციაზე გადასვლის ინიციატივის მიზანია, ჯარში კვების ხარისხის გაუმჯობესება და ადგილობრივი ბაზრისა და მეწარმეების წახალისება“, – განაცხადა ხიდაშელმა.
