თბილისში გაიმართა საქართველოს ეპარქიის სომეხთა სამოციქულო მართლმადიდებელი წმინდა ეკლესიის „სურბ გევორგის“ საკათედრო ტაძრის ხელახალი კურთხევისა და გახსნის ცერემონიალი, რომელიც შეასრულა სრულიად სომეხთა კათოლიკოსმა უწმინდესმა და უნეტარესმა გარეგინ მეორემ.
საზეიმო ცერემონიალს ესწრებოდნენ სომხეთის პრეზიდენტი სერჟ სარგისიანი, ბიზნესმენი ბიძინა ივანიშვილი, განსახლებისა და ლტოლვილთა მინისტრი სოზარ სუბარი, საქართველოს მთავრობის სხვა წევრები და სომხური საზოგადოების წარმომადგენელნი.
ცერემონიალის დასრულების შემდეგ, ტაძრის რესტავრაციასა და აღდგენის მნიშვნელობაზე ისაუბრა და ორ ერს შორის არსებულ მრავალსაუკუნოვან მეგობრობაზე გააკეთა აქცენტი სოზარ სუბარმა: „დაახლოებით ორი წლის წინ აქ ვიყავით, როდესაც ბიძინა ივანიშვილმა დადო პირობა, რომ ამ ტაძრის რესტავრაცია და აღდგენა მოხდებოდა. და დღეს ეს შესრულდა. მრავალმხრივი ძალისხმევით მოხერხდა ტაძრის აღდგენა, რაშიც ჩართული იყო საქართველოს მთავრობა, სომხური ეკლესია, ბატონი ბიძინა ივანიშვილი, არა ერთი სომხური ეკლესია. ეს კიდევ ერთი დასტურია იმისა, რომ ჩვენი მეგობრობა, რომელიც მრავალი ათასწლეულია მოდის კიდევ გრძელდება ამიერკავკასიაში, კერძოდ კი საქართველოს მიწაზე, რომელიც არის მრავალფეროვნებითა და ტოლერანტობით გამორჩეული“.
კომენტარი გააკეთა ბიძინა ივანიშვილმაც, რომელიც ეკლესიის რესტავრაციის მთავარ დონორთა სიაში იმყოფება. „ძალიან სასიამოვნოა, რომ ტაძარი აღდგა. ამდენი საუკუნეა ერთად ვცხოვრობთ და ძალიან ცოტა წყენა შეიძლება გავიხსენოთ. კამათი, რაც გრძელდება დღეს ორ ერს შორის, არის, შეიძლება ითქვას, ძალიან სასიამოვნო და სიმბოლური. ჩვენ ვკამათობთ რომელი კულტურული ძეგლი ვის ეკუთვნის და თუ საერთოდ ისტორიას ვუყურებთ ჩვენ, მრავალი საუკუნის განმავლობაში ძმობისა და მეგობრობის მეტი არაფერი გაგვიკეთებია,“- აღნიშნა მან.
მეიდანის „სურბ გევორგის“ (წმინდა გიორგი) ტაძარი – ერთ-ერთი უძველესი ეკლესიაა თბილისში, ამჟამად სომეხთა სამოციქულო წმინდა მართლმადიდებელი ეკლესიის საქართველოს ეპარქიის წინამძღვრის რეზიდენციაა. ნაგებობამ ჩვენამდე სერიოზული დაზიანებებით მოაღწია და მას საფუძვლიანი რესტავრაცია ესაჭიროებოდა.
რეკონსტრუქციის პროექტის განხოლციელება დაიწყო 2012 წელს, “სომხეთის განვითარების ინიციატივების“ (IDEA) ფონდის, საქართველოს მთავრობის მხარდაჭერითა და სრულიად სომეხთა კათოლიკოსის კურთხევით.
ეკლესიის აღდგენით სამუშაოებში ჩართულნი იყვნენ როგორც სომეხი, ასევე ქართველი სპეციალისტები. პროცესმა სამ წელს გასტანა, რის შედეგადაც ეკლესიამ აღიდგინა პირვანდელი სახე – მოპირკეთდა აგურით. ასევე ჩაუტარდა გამაგრებითი თუ სხვა საჭირო სამუშაოები (საძირკვლის, კედლების და გუმბათის გამაგრება, კანკელის და ფრესკების რესტავრაცია).
„სურბ გევორგის“ ეკლესია აღდგინეს ქველმოქმედთა შემოწირულობებით. სარესტავრაციო პროექტის საერთო ღირებულება შეადგენს 3,5 მილიონ დოლარს.
საქართველოს სომხებისა და ქალაქ თბილისისათვის მნიშვნელოვანი კულტურული ძეგლის აღდგენის საქმეში მხარდაჭერისთვის დონორების მიმართ მადლიერებას გამოთქვამს ფონდ IdeA-ს თანადამფუძნებელი რუბენ ვარდანიანი. მან აღნიშნა, რომ სამომავლოდ ტაძართან არსებული კულტურულ-საგანმანათლებლო ცენტრის შექმნა იგეგმება“.
„სომეხთა სამოციქულო წმიდა ეკლესია სრულიად სომეხთა დედა ეკლესიაა, ვინაიდან ათას შვიდასი წელია ის სულიერ საზრდოს აძლევს თავის შვილებს, დედობრივი მზრუნველობით გარშემო შემოიკრიბა მსოფლიოში გაფანტული სომხობა. სომეხთა ეკლესიამ დაიცვა და შეინარჩუნა სომხური დამწერლობა, საუკუნოვანი სასულიერო მუსიკა და ხელოვნების დარგები. ტაძარი მაღალი ღირებულების მქონე ფრესკებითა და სულიერი ღირებულებით ხდება როგორც სომხური სათვისტომოს, ასევე თბილისის გულში აღმოცენებული მარგალიტი, რომელიც ამდიდრებს მრავალეთნიკურ და მრავალკონფესიურ ქალაქს“, – ამბობს საქართველოს სომეხთა ეპარქიის წინამძღვარი მისი ყოვლადუსამღვდელოესობა ეპისკოპოსი ვაზგენ მირზახანიანი.
ცერემონიალის შემდეგ ეკლესიის რესტავრაციის პროექტის ქველმოქმედთა სახელით გაიხსნა მემორიალური დაფა.
მოამზადა
სოფიკო ნინიკაშვილმა