პაატა საბელაშვილმა დააარსა 2006 წელს საქართველოში ლგბტ საზოგადოება, რომელიც ლგბტ პირების ლობირებითა და ადვოკატირებით იყო დაკავებული, ამის შესახებ წერს skandal.ge.
საინფორმაციო საიტზე ვკითხულობთ, რომ 2009 წელს პაატა საბელაშვილი დააკავეს და მას ბრალად ედებოდა საქართველოს სისხლის სამართლის კოდექსის 260-ე მუხლის პირველი ნაწილით (ნარკოტიკული საშუალების, მისი ანალოგის ან პრეკურსორის უკანონო დამზადება, წარმოება, შეძენა, შენახვა, გადაზიდვა, გადაგზავნა ან გასაღება) და 262-ე მუხლის პირველი ნაწილით (საქართველოში ნარკოტიკული საშუალების, მისი ანალოგის ან პრეკურსორის უკანონოდ შემოტანა, საქართველოდან უკანონოდ გატანა ან ტრანზიტით საერთაშორისო გადაზიდვა) გათვალისწინებული დანაშაულის ჩადენა.
საქართველოს მაშინდელ სახალხო დამცველს მიაჩნდა, რომ პაატა საბელაშვილის დაკავებისას საქართველოს სისხლის სამართლის საპროცესო კოდექსისა და პოლიციის ეთიკის კოდექსის ნორმები დაირღვა. როგორც ამბობდნენ, პაატა საბელაშვილის გასათავისუფლებლად ევროკავშირის, გაეროს და სხვადასხვა საელჩოს წარმომადგენლებიც ,,შეწუხდნენ” .
ამჯერად პაატა საბელაშვილი ორგანიზაცია ”ზიანის შემცირების საქართველოს ქსელის” პროგრამების მენეჯერია, რომელსაც ევროკავშირი და ”ღია საზოგადოება საქართველო” აფინანსებს.
ორგანიზაცია ”იდენტობა” ქუჩაში აქციების მოწყობის გარდა, უშვებს წიგნებს მშობლებისთვის, ჟურნალისტებისთვის, სამართლისა და სამედიცინო განხრის სტუდენტებისთვის. აქვთ თავიანთი ლგბტ ტერმინოლოგიის ლექსიკონი და ლგბტ ფსიქოლოგია, რომელიც დაფინანსებულია ნიდერლანდების საელჩოს მიერ.
2011 წელს ორგანიზაციამ საბაზო დაფინანსება ამერიკიდან 55 ათასი აშშ დოლარი მიიღო, ხოლო 2012 წელს ნიდერლანდების სამეფოს საელჩოს მხარდაჭერით – 53 ათასი ევრო. პროექტის მთავარი მიზანი ქართველ სტუდენტებში ლგბტ საკითხებისადმი მგრძნობელობის ამაღლება იყო. ორგანიზაცია ატარებს ტრენინგებს და კონფერენციებს სტუდენტებისთვის ლგბტ საკითხებზე. ჰოლანდიის საელჩომ სტუდენტური კონფერენციის მონაწილეებისთვის სტიპენდიაც დააწესა 320 ლარის ოდენობით, – წერს skandal.ge.
02.07.13
