საფრანგეთში სამდღიანი გლოვა გამოცხადდა. როგორც საფრანგეთის პრეზიდენტმა ფრანსუა ოლანდმა ერისადმი მიმართვაში განაცხადა, მან შესაბამის განკარგულებას ხელი მოაწერა.
ოლანდმა მიმართვაში აღნიშნა, რომ ტერაქტები “ისლამური სახელმწიფოს” წევრებმა განახორციელეს, თავდასხმების დაგეგმვა ქვეყნის საზღვრებს გარეთ მოხდა.
ტერაქტების შემდეგ საფრანგეთში საგანგებო მდგომარეობა გამოცხადდა. ფრანსუა ოლანდის თქმით, უსაფრთხოების უზრუნველსაყოფად მობილიზებულია არმია და საპოლიციო ძალები. სამხედროები პარიზის ქუჩების პატრულირებას გააგრძელებენ.
საფრანგეთის პრეზიდენტის განცხადებით, ორშაბათს ის პარლამენტის წინაშე წარსდგება. რიგგარეშე სხდომა ტერაქტებთან დაკავშირებით გაიმართება. ოფიციალური ინფორმაციით, ტერაქტების შედეგად სულ მცირე 129 ადამიანი დაიღუპა და 352-ზე მეტი დაშავდა.
