დღეს, საქართველოს ორდღიანი ოფიციალური ვიზიტით სან მარინოს რესპუბლიკის საგარეო საქმეთა მინისტრი, პასკუალე ვალენტინი ეწვევა.
კოლეგას საქართველოს ვიცე-პრემიერი, საგარეო საქმეთა მინისტრი გიორგი კვირიკაშვილი უმასპინძლებს, საგარეო საქმეთა სამინისტროში გაიმართება ოფიციალური შეხვედრა, რის შემდეგაც მინისტრების პრესკონფერენცია გაიმართება. ვიზიტის ფარგლებში მინისტრები ხელს მოაწერენ ურთიერთგაგების მემორანდუმს სან მარინოს რესპუბლიკისა და საქართველოს საგარეო საქმეთა სამინისტროებს შორის. ორ დღიანი ვიზიტის ფარგლებში პასკუალე ვალენტინი საქართველოს პრეზიდენტს, პრემიერ-მინისტრს, პარლამენტის თავმჯდომარეს შეხვდება. სან მარინოს საგარეო საქმეთა მინისტრი მოინახულებს საოკუპაციო ხაზთან მდებარე სოფელ ხურვალეთს, პატივს მიაგებს საქართველოსათვის დაღუპულ გმირთა მემორიალს და ესტუმრება საქართველოს ეროვნულ მუზეუმს. აღსანიშნავია, რომ ეს გახლავთ სან მარინოს საგარეო საქმეთა მინისტრის პირველი ოფიციალური ვიზიტი საქართველოში.
