საქართველოს გაერთიანებული წყალმომარაგების კომპანიას მენეჯმენტში კონსულტაციებს გერმანული კომპანია, Sachsen Wasser GmbH-ი გაუწევს.
წყალმომარაგების კომპანიის ცნობით, შესაბამის კონტრაქტს, რომლის ღირებულება 2 466 785,64 ევროა, წყალმომარაგების კომპანიაში ხელი დღეს მოეწერა. კონსულტაციები აზიის განვითარების ბანკისგან აღებული სესხის ფარგლებში ფინანსდება.
გერმანული კომპანია Sachsen Wasser GmbH-ი საერთაშორისო ტენდერის შედეგად გამოვლინდა. ის დაკომპლექტებულია წყალმომარაგების სფეროში გამოცდილი ექსპერტებით და საქართველოს წყალმომარაგების კომპანიას მენეჯმენტის გაძლიერებაში, მომსახურე პერსონალის პროდუქტიულობის გაზრდასა და ეფექტურ მუშაობაში დაეხმარება.
კონტრაქტორი ვალდებულია, კომპანიას წარუდგინოს კვალიფიციური და გამოცდილი სპეციალისტები, რომლებიც კომპანიას ხელს შეუწყობენ ძირითადი ფუნქციების ეფექტურად განხორციელებაში, მათ შორის წყლის მოპოვებასა და მიწოდებაში; კომერციულ სერვისებში, როგორიცაა ბილინგი და შემოსავლები; მომხმარებელთა მომსახურებაში, მათ შორის, მომხმარებლების საჩივრების განხილვასა და გადაწყვეტაში; ორგანიზაციულ ეფექტიანობაში; ფინანსების მართვაში, ბუღალტერიაში, შემოსავლებისა და ხარჯების მართვაში; ინფორმაციის მართვაში, ანალიზსა და კონტროლში და ადამიანური რესურსების მართვაში.
კონტრაქტის მოქმედების ვადად განსაზღვრულია 36 თვე. ხელშეკრულების მიხედვით, იმისთვის, რომ კონტრაქტორმა ხელშეკრულებით გათვალისწინებული ანაზღაურება სრულად მიიღოს, ვადის გასვლის შემდეგ მიღწეული უნდა იყოს შემდეგი – კომპანიის მუშაობის ეფექტურობა და კომპანიის თანამშრომელთა პროდუქტიულობა 20%-ით უნდა იყოს გაზრდილი.
03.07.13
