განკარგულება, რომელსაც რუსეთის პრეზიდენტმა ვლადიმერ პუტინმა ხელი უკვე მოაწერა, თურქეთიდან პროდუქტის იმპორტზე, გარკვეულ შეზღუდვებს აწესებს.
ამავე დადგენილებით, რუსულ კომპანიებს ეკრძალებათ თურქეთის მოქალაქეების დასაქმება, ხოლო რუსეთში მომუშავე კომპანიებს, გარკვეული შეზღუდვები ექნებათ და იგივე პირობებით ვერ ისარგებლებენ, რითაც სხვა ქვეყნის კომპანიები სარგებლობენ.
ვლადიმერ პუტინმა უკვე მოუწოდა რუსულ ტუროპერატორებს, გაყიდვიდან ამოიღონ თურქეთის საგზურები. თავის მხრივ თურქეთის პრეზიდენტმაც მოუწოდა საკუთარი ქვეყნის მოქალაქეებს, რომ ორ ქვეყანას შორის სიტუაციის დასტაბილურებამდე, რუსეთში ვიზიტისგან თავი შეიკავონ.
ორ ქვეყანას შორის უკვე შეჩერდა უვიზო მიმოსვლა და სამხედრო ურთიერთობები.
შეგახსენებთ, რომ რუსეთ-თურქეთის ურთიერთობა მას შემდეგ დაიძაბა, რაც თურქეთმა საჰაერო სივრცის დარღვევისთვის, რუსეთის სამხედრო თვითმფრინავი სუ-24 რამდენიმე გაფრთხილების შემდეგ ჩამოაგდო. რუსეთი თურქეთის საზღვრის დარღვევას უარყოფს, თუმცა, თურქულმა მხარემ ის აუდიო-ვიდეო ჩანაწერები გამოაქვეყნა, სადაც პილოტს საზღვრის დარღვევის თაობაზე აცნობეს და გააფრთხილეს, რომ თუ კიდევ დაარღვევდნენ, მაშინ ჩამოგდება ემუქრებოდათ.
