დღე, კინოთეატრ ამირანში რიგით 16-ე თბილისის საერთაშორისო კინოფესტივალი ლევან თუთბერიძის ფილმის „მოირას“ პრემიერით გაიხსნება. ღონისძიებას საქართველოს კულტურისა და ძეგლთა დაცვის მინისტრი მიხეილ გიორგაძე დაესწრება.
ფესტივალი წელს ქალთა უფლებებისა და გენდერული დემოკრატიის განვითარებას ეძღვნება. ქალთახედვა/”Women Eyes“ – სექციის ფარგლებში მოეწყობა ქალი რეჟისორების მიერ გადაღებული სრულმეტრაჟიანი მხატვრული და დოკუმენტური ფილმების ჩვენება. მათი ნამუშევრები ფესტივალის სხვა სექციების ფოკუსშიც იქნება. წლევანდელი ფესტივალის რჩეული ფერი იასამნისფერია, რაც ქალთა მიმართ ძალადობის საერთაშორისო კამპანიის სიმბოლოა. კინოჩვენებების გარდა, ფესტივალის ფარგლებში მოეწყობა დისკუსიები ქალთა უფლებების, გენდერული ძალადობისა და ქალის, როგორც საზოგადოებრივად აქტიური ფიგურის საკითხის გარშემო. ლექცია-დისკუსიებს ადგილობრივი და სამხრეთ კავკასიის რეგიონიდან მოწვეული მომხსენებლები გამართავენ.
თბილისის კინოფესტივალის მნიშვნელოვანი ნაწილია საერთაშორისო კონკურსი, რომელშიც ევროპელი კინორეჟისორების 9 სრულმეტრაჟიანი მხატვრული ფილმი მონაწილეობს. ტრადიციულად საუკეთესო ფილმი ოქროს, ხოლო საუკეთესო რეჟისურა ვერცხლის პრომეთეთი დაჯილდოვდება. საერთაშორისო კონკურსის გამარჯვებულებს ჟიური გამოავლენს, რომლის თავმჯდომარეც ბრიტანელი რეჟისორი მარტა ფაენსია.
წელს მესამედ გაიმართება ეროვნული კონკურსი, რომელიც ქართული პანორამის ფარგლებში ტარდება. წინა წლებისგან განსხვავებით ეროვნულ კონკურსში სრულმეტრაჟიანი მხატვრული, მოკლემეტრაჟიანი და დოკუმენტური ფილმები მიიღებენ მონაწილეობს. შესაბამისად გამარჯვებულები 3 ნომინაციაში გამოვლინდებიან. ეროვნული კონკურსის ჟიურის წევრები არიან: კინომცოდნე და კრიტიკოსი ულრიხ გრეგორი, კინომცოდნე ერიკა გრეგორი და კინოკრიტიკოსი ხოსეინ ეიდიზადე.
თბილისის მე-16 საერთაშორისო კინოფესტივალი დიტო ცინცაძის ფილმით „ბედნიერების ღმერთი“ დაიხურება.
თბილისის საერთაშორისო კინოფესტივალის მხარდამჭერები არიან: საქართველოს კულტურისა და ძეგლთა დაცვის სამინისტრო, თბილისის მერია და საქართველოს კინემატოგრაფიის ეროვნული ცენტრი. ფესტივალის გენერალური სპონსორია აჭარანეტი.
