ოთარ დანელიამ სოფლის განვითარების ხედვა საჯარო განხილვისთვის წარმოადგინა

საქართველოს სოფლის მეურნეობის მინისტრმა, ოთარ დანელიამ საერთაშორისო კონფერენციაზე სოფლის განვითარებასთან დაკავშირებით სოფლის მეურნეობის სამინისტროს ხედვა საჯარო განხილვისთვის წარმოადგინა. სოფლის განვითარების გეგმის საბოლოო დოკუმენტის შესამუშავებლად, სოფლის მეურნეობის სამინისტროს ინიციატივით,  კონფერენციაში მონაწილეობა მიიღო ყველა ის უწყებამ, რომელიც სოფლის განვითარების პროცესში სხვადასხვა მიმართულებით ჩაერთვება.

როგორც სოფლის მეურნეობის მინისტრმა აღნიშნა, მნიშვნელოვანია სოფლად ცხოვრების მაქსიმალურად მაღალი სტანდარტი შეიქმნას, რისთვისაც აუცილებელია ყველა შესაბისი უწყების ჩართულობით შემუშავდეს ერთიანი ხედვა, შემდგომ სტრატეგია და განხორციელების სწრაფი ვადები.

„პირველ რიგში აუცილებელია ერთიანი პოლიტიკა შემუშავდეს ყველა იმ უწყების მიერ, რომლებიც სოფლის განვითარების კონკრეტული მიმართულებებით იმუშავებენ. მოგეხსენებათ, სოფლის განვითარება მრავალ მიმართულებას გულისხმობს და მათ შორის, ერთ-ერთი მნიშვნელოვანი კომპონენტი სოფლის მეურნეობაა. არაერთი უწყების მიერ სოფლის განვითარების მრავალი პროექტი ხორციელდება. ამ პროექტების ერთიანი ხედვით, ერთიანი სტრატეგიით განხორციელება დასახულ მიზნამდე უფრო სრაფად და ეფექტიანად მიგვიყვანს“, – განაცხადა ოთარ დანელიამ.

საერთაშორისო კონფერენცია „სოფლის განვითარება საქართველოში” საქართველოს სოფლის მეურნეობის სამინისტროსა და გაეროს სურსათისა და სოფლის მეურნეობის ორგანიზაციის (FAO) საქართველოს წარმომადგენლობის მიერ, ევროკავშირის პროგრამა ENPARD-ის ფარგლებში და ევროკავშირისა და ავსტრიის განვითარების სააგენტოს (ADC) დაფინანსებით გაიმართა.

კონფერენციაზე სოფლის განვითარების ხედვის დოკუმენტის  პირველადი ვერსია განიხილეს.

დოკუმენტი სამი მნიშვნელოვანი ნაწილისგან შედგება:

1. საქართველოში სოფლის მდგომარეობის ზოგადი მიმოხილვა, როგორც სასოფლო-სამეურნეო, ისე განათლების, ჯანდაცვისა და დემოგრაფიული მიმართულებებით

2. კონკრეტული მიდგომები, აქტივობები და ღონისძიებები, რომლებიც უნდა გატარდეს სოფლის განვითარების ხედვისა და მიზნების განსახორციელებლად

3. ყველა იმ უწყების ჩართულობის მნიშვნელობა, რომლებსაც სოფლის განვითარების პროცესის მხარდაჭერა შეუძლიათ

აღნიშნული დოკუმენტის განხილვისა და შემდგომი მსჯელობის შედეგად, შემუშავდება რეკომენდაციები სოფლის განვითარების ხედვის დოკუმენტის საბოლოო ვერსიის ჩამოყალიბებისთვის. მიღებული დოკუმენტი საფუძვლად დაედება სოფლის განვითარების სტრატეგიას,  რომელიც უახლოეს მომავალში შემუშავდება.

კონფერენციას ესწრებოდნენ ევროკავშირის ელჩი საქართველოში იანოშ ჰერმანი, ევროკავშირის დელეგაციის ოპერაციების ხელმძღვანელი კაიდო სირელი, საქართველოს მთავრობის, დიპლომატიური კორპუსისა და საერთაშორისო ორგანიზაციების წარმომადგენლები.