ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის დავით ბაქრაძის მტკიცებით, ევროკომისიის ანგარიშის გამოქვეყნების თარიღში ცვლილების შეტანის მიზეზი საქართველო, ან მასთან დაკავშირებული რაიმე საკითხი არ ყოფილა.
მინისტრის თქმით, გუშინ ევროკავშირის წევრი ქვეყნების ლიდერებთან სხვადასხვა დონეზე გამართული კონსულტაციებისა და კომუნიკაციის დროს კიდევ ერთხელ გაესვა ხაზი და დადასტურდა, რომ შედეგები, რომელიც მოხსენებით გახდება ცნობილი, დამოკიდებულია მხოლოდ საქართველოს მთავრობის მიერ გატარებულ რეფორმებსა და იმ შედეგებზე, რომელიც ამ მხრივ იქნა მიღწეული და არა სხვა რაიმე ფაქტორზე.
“ასევე ხაზგასმით იქნა აღნიშნული, რომ კიდევ რამდენიმე დღეს დაიკავებს ანგარიშის მომზადება, რაც არის დაკავშირებული მათივე განმარტებით პროცედურულ ტექნიკურ საკითხებთან. უახლოეს დღეებში გახდება ცნობილი ეს ანგარიში. რაც შეეხება უკრაინასთან დამოკიდებულებას, უნდა ითქვას, რომ საქართველოსა და უკრაინის შემთხვევაში, ეს არის ორი სრულიად განსხვავებული დოკუმენტი, როგორც შინაარსობრივად, ასევე არსებითად, რომელთა გამოქვეყნებაც შეიძლება უბრალოდ დროში დაემთხვას ერთმანეთს. ეს ორი ანგარიში ერთ პაკეტში მოქცეული არ არის. ისინი უბრალოდ გამოქვეყნების თარიღით დაემთხვევა”, – განაცხადა დავით ბაქრაძემ.
დღეს ევროკომისიას ვიზალიბერალიზაციასთან დაკავშირებით ანგარიში უნდა გამოექვეყნებინა. საქართველოს მთავრობა ვარაუდობდა, რომ ანგარიში დადებითი იქნებოდა, თუმცა გუშინ გახდა ცნობილი, რომ ანგარიშის გამოქვეყნება კიდევ რამდენიმე დღით გადაიდო.
