გირგვლიანების ოჯახის შემდეგ ყველაზე დიდი ტალახი ამ საქმესთან დაკავშირებით მე მომხვდა, – აღნიშნული განცხადება იუსტიციის უმაღლესი საბჭოს მდივანმა ლევან მურუსიძემ გააკეთა. იუსტიციის უმაღლესი საბჭოს მოსამართლეებმა, საბჭოს მდივან ლევან მურუსიძესთან ერთად, დღეს გამართულ პრესკონფერენციაზე კიდევ ერთხელ ისაუბრეს სანდრო გირგვლიანის საქმეზე.
“ჩვენც ადამიანები ვართ, ოჯახები გვყავს, გული შეგვტკივა კონკრეტულად ყველა საქმეზე და ყველა თემაზე, მაგრამ ჩვენ ვალდებულები ვართ, დავემორჩილოთ კანონს. შესაბამისად, სასამართლო მოქმედებდა იმ კანონებით, რომელიც მიღებული იყო და არ შეეძლო, მოცემულ შემთხვევაში სხვა გადაწყვეტილება მიეღო. მინდა მივმართო საზოგადოებას, შვილმკვდარ მამას – ერთადერთი რასაც ისინი ითხოვდნენ, იყო მოსამართლეს გაეხადა მოსამართლის მანტია და პროკურორის უფლებამოსილებით აღჭურვილიყო და გარდა შემსრულებლებისა, პასუხისგებაში მიეცა სხვა პირები, ვინც იყვნენ ამ დანაშაულის ორგანიზატორები. სამართლებრივად, გვითხარით რა დავაშავე, რა დააშავა უზენაესმა სასამართლომ? რა გადაწყვეტილება შეიძლებოდა მიეღო და არ მიიღო? ერთადერთი ჩემი წუხილი არის ის, რომ ეს აჟიოტაჟი, რომელსაც მე პიროვნულად განვიცდი, იმ ოჯახის ტრაგედიასაც განვიცდი. იმ ოჯახის შემდეგ ყველაზე დიდი ტალახი ამ საქმესთან დაკავშირებით მე მომხვდა. მე ამას განვიცდი, ადამიანურად განვიცდი, მაგრამ მინდა გაიგოთ, რომ ეს იყო კანონები, რომელიც თავსმოხვეული იყო სასამართლოს წინაშე და უნდა დავილაპარაკოთ, რომ მომავალშიც არ განმეორდეს იგივე. ის კანონები, რომლებიც მოქმედებდა მაშინ, მოქმედებს დღესაც, ამიტომ ყველა ერთად უნდა დავირაზმოთ, მოხდეს ხელისუფლებასთან დიალოგი და შევცვალოთ კანონები, რომლებიც არ მოგვწონდა 10 წლის წინ. ისინი მოქმედებს დღესაც და მოსამართლეებს ხელ-ფეხი უნდა გაეხსნათ მიიღონ ისეთი გადაწყვეტილებები, რომლებიც იქნება არამარტო კანონიერი, არამედ საზოგადოებისთვის სამართლიანიც”, – განაცხადა მურუსიძემ. უფრო
კონკრეტულად, მურუსიძის თქმით, საუბარია იმაზე, რომ სასამართლოს მიეცეს საქმის გამოძიებაში დაბრუნების საშუალება. მოსამართლეების თქმით, დღეს მოსამართლეს კითხვის დასმის საშუალებაც არ აქვს. მურუსიძის თქმით, ის ბოლომდე აპირებს იბრძოლოს სააპელაციო სასამართლოში უვადო წევრად დანიშნვისთვის და ამ მიზნის მიღწევის შემთხვევაში ყველანაირად შეეცდება, არსებული კანონების შეცვლას მიაღწიოს. კითხვაზე, მანამდე რატომ არ აპროტესტებდა ლევან მურუსიძე კანონებს, რომლებიც მოსამართლეების უფლებებს ზღუდავს, მურუსიძის თქმით, გაპროტესტება დაიწყო მას შემდეგ, რაც იუსტიციის საბჭოს მდივანი გახდა, თუმცა მოსამართლეებს საკანონმდებლო ინიციატივის უფლება არ აქვთ. ამიტომ ისინი სთხოვენ პოლიტიკოსებს, მოისმინონ, რა პრობლემები აქვთ მოსამართლეებს.