საკვებ პროდუქტებსა და პირველადი მოხმარების საგნებზე ფასები 2008 წლის ნიშნულს უბრუნდება. ხორცი, ბურღულეული, შაქარი, პურის ფქვილი თუ სხვა საკვები პროდუქტების ფასი, 2009-12 წლებთან შედარებით, დაახლოებით 30-40%-ით არის შემცირებული – წერს გაზეთი „რეზონანსი“.
ექსპერტების მოსაზრებით, ფასების კლება დაკავშირებულია ბაზარზე თავისუფალი მოთამაშეების გამოჩენასთან და მსოფლიოში ფასების შემცირებასთან. მეტიც, არ არის გამორიცხული, რომ ფასების შემცირების ტენდენცია კიდევ გაგრძელდეს.
ბოლო ოთხი წლის განმავლობაში საკვები პროდუქტები რამდენიმე პროცენტით გაძვირდა. განსაკუთრებით შესამჩნევი იყო ფასების მატება იმ პროდუქტებზე, რომელთაც რეგულარულად მოიხმარს მოსახლეობა. მაგალითად, 2008 წლიდან დღემდე ძროხის ხორცის ფასმა 62%-ით მოიმატა, ღორის ხორცმა კი 25%-ით. საპირისპირო ტენდენცია შეიმჩნევა ქათმის ხორცთან დაკავშირებით, მისი ფასი 2012 წელს 2008 წელთან შედარებით 2%-ით შემცირდა. 2013 წლიდან კი ხორცის ფასმა კლება დაიწყო. დღეს ერთი კილოგრამი საქონლის ხორცი დაახლოებით 9-10 ლარი ღირს, ღორის ხორცი – 8-9 ლარი, ხოლო ქათმის – 5,5-6 ლარი.
2012 წლამდე ძვირდებოდა შაქარიც. თუ მისი ფასი 2008 წელს 1,50-1,60 ლარი იყო, 2009-11 წლებში 1 კილოგრამი შაქრის შეძენა 1,80 ლარიდან 2,60 ლარამდე თანხის ფარგლებში შეიძლებოდა. იგივე ტენდენცია ვლინდებოდა კარტოფილის, ხორბლის ფქვილის, წიწიბურასა და იმერული ყველის შემთხვევაში. ამ საკვებ პროდუქტებზე 2013 წლიდან ფასების შემცირება დაიწყო.
საკვები პროდუქტებისგან გასნხვავებით არ შემცირებულა ფასები პირველადი მოხმარების საგნებსა და ჰიგიენურ საშუალებებზე, როგორებიცაა სარეცხი საშუალებები, საპონი თუ თმის მოვლის საშუალებები. სამაგიეროდ , მკვეთრად შემცირდა მედიკამენტების ღირებულება. ბოლო მონაცემებით, ოქტომბრიდან მოყოლებული, წამლები 20-40%-ით გაიაფდა.
ასევე, კლება აღინიშნება ნავთობპროდუქტებზე. 2012 წლის პირველ ოქტომბრამდე 1 ლიტრი „რეგულარის“ ტიპის ბენზინი 2,15 ლარი ღირდა, ხოლო „დიზელი“ – 2,2 ლარი. ამჯერად, მათი ფასი, ბრენდირებულ ავტოგასამართ სადგურებზე 1,95, ხოლო არაბრენდირებულზე – 1,85 ლარია.
როგორც ციფრებიდან ჩანს, 2008-2012 წლებში სხვადასხვა პროდუქტზე მომატებულმა ფასებმა 2013 წლიდან შემცირება დაიწყო. ოფიციალური მონაცემებით, „ვარდების რევოლუციიდან“ 2012 წლამდე ინფლაციის მაჩვენებელი 65-70%-ით გაიზარდა, არაოფიციალურად კი მატება 300% იყო.
„როდესაც ბაზარზე ახალი მოთამაშეები ჩნდებიან, როდესაც მონოპოლიისაგან თავის დაზღვევა ხდება, ცხადია, ეს წარმოშობს ჯანსაღ კონკურენციას, რაც საბოლოოდ ფასების კლებაზე მოქმედებს. გარკვეული პროდუქტების ღირებულების შემცირების მეორე მიზეზი არის ის, რომ 2008 წლის შემდეგ ფასები ისეთ მაღალ ნიშნულზე იყო, რომ მისი გაზრდის რესურსი აღარ არსებობდა. მესამე კი არის ის, რომ მსოლფიო ბაზრებზეც შემცირდა ამა თუ იმ პროდუქტის ფასი“ – აცხადებს გაზეთ „რეზონანსთან“ საუბრისას ექსპერტი ეკონომიკის საკითხებში სოსო არჩვაძე. ექსპერტი ფასების შემცირებას მომავალშიც პროგნოზირებს, თუმცა ამბობს, რომ ამისათვის აუცილებელია ე.წ. კოოპერატივების ამუშავება -„ საქართველოში ფასების შემცირების რესურსი კიდევ არსებობს. თუ შეიქმნება კოოპერატივები და სოფლის მეურნეობის პროდუქციის მიწოდება ქაოსურად აღარ მოხდება, მაშინ ფასები კიდევ უფრო დაიწევს“, – წერს გაზეთი „რეზონანსი“
09.07.13
თამთა ჭრიკიშვილი
