დღეს, ახალი წლის ღამეს თავისუფლების მოედანზე საახალწლო გალა-კონცერტი გაიმართება. თბილისის მერიის ინფორმაციით, მიშა მდინარაძის საავტორო პროექტით მომზადებული კონცერტი ქართულ-ევროპული, კლასიკური და თანამედროვე მუსიკის ერთობას წარმოადგენს.
კერძოდ, სამი ნაწილისაგან შემდგარი კონცერტი სპეციალურად პროექტისთვის შექმნილ საახალწლო კომპოზიციებს, საოპერო და საესტრადო შემსრულებლების დუეტებს და საშობაო ალილოს აერთიანებს. კონცერტზე შეკრებილები ახალ, 2016 წელს ტრადიციული მრავალჟამიერის ფონზე შეეგებებიან.
საახალწლო კონცერტში მონაწილეობას 200-ზე მეტი მუსიკოსი მიიღებს, მათ შორის, ზაქარია ფალიაშვილის სახელობის ოპერისა და ბალეტის სიმფონიური ორკესტრი და გუნდი, საოპერო და ესტრადის მომღერლები და მოცეკვავეები. თბილისის მერიის კულტურის საქალაქო სამსახურის ხელმძღვანელის, ია მაქაცარიას განცხადებით, თავისუფლების მოედანზე საახალწლო გალა-კონცერტის მოსაწყობად 235 ათასი ლარი დაიხარჯა. კონცერტი 22:30 საათზე დაიწყება. სადღესასწაულო ღონისძიებები 25 დეკემბერს ვარდების მოედანზე საახალწლო ქალაქის გახსნით დაიწყო და 7 იანვარს “ალილოთი” დასრულდება. თბილისის მერიის ინფორმაციით, წელს, საშობაო-საახალწლო ღონისძიებებისთვის საერთო ჯამში, დაახლოებით 1,5 მლნ ლარი გამოიყო.
