შსს სამინისტრო ინიციატივით „ადმინისტრაციულ სამართალდარღვევათა კოდექსში“ ცვლილებები შედის. კერძოდ, პროექტის თანახმად „ალკოჰოლური სასმელების სმა ქუჩაში, სტადიონებზე, სკვერებში, პარკებში, ყველა სახის საზოგადოებრივ ტრანსპორტში და სხვა საზოგადოებრივ ადგილებში, გარდა სავაჭრო და საზოგადოებრივი კვების საწარმოებისა, სადაც ალკოჰოლური სასმელების ჩამოსხმით გაყიდვა ნებადართულია, ასევე საზოგადოებრივ ადგილებში ადამიანის ღირსებისა და საზოგადოებრივი ზნეობის შეურაცხმყოფელ მდგომარეობასი ყოფნა გამოიწვევს დაჯარიმებას 300 ლარის ოდენობით. აღნიშნული ქმედების წლის განმავლობაში განმეორებით ჩადენა 500 ლარიანი ჯარიმის დაკისრებით დაისჯება, ხოლო მესამე შემთხვევაში გამოიწვევს პირის დაჯარიმებას 700 ლარის ოდენობით“
შსს-ს საზოგადოებასთან ურთიერთობის უფროსმა, ნინო გიორგობიანმა ეს ცვლილება თავის facebook-ს გვერდზე შემდეგნაირად განმარტა: „საზოგადოებრივი ზნეობის შეურაცხმყოფ მდგომარეობაში ყოფნა, -ამგვარ მოქმედებად შეძლება მოვიაზროთ მაგალითად გაშიშვლება და მასთან დაკავშირებული ცალკეული მოქმედებები, საზოგადოებრივ ადგილებში მოსაქმება და სხვა მსგავსი უხამსობები და არა დაუშვათ პაემანი და კოცნა, რაც არავითარ შემთხვევაში არ შეიძლება ჩაითვალოს ასეთ ქმედებად. ძირითადი ცვლილება ეხება – ქუჩაში სტადიონზე, ტრანსპორტში და სხვა ადგილებში ალკოჰოლური სასმელების სმისთვის პასუხისმგებლობის გამკაცრებას.“
ამავე პროექტის თანახმად, თუ საქმის გარემოებათა მიხედვით და დამრღვევი პიროვნების გათვალისწინებით აღნიშნული ზომების მიღება არასაკმარისად ჩაითვლება, გათვალისწინებულია ადმინისტრაციული პატიმრობა 15 დღე -ღამის ვადით.
ასევე არაფხიზელ მდგომარეობაში სატრანსპორტო საშუალების მართვაზე ადმინისტრაციული პასუხისმგებლობა მკაცრდება და სანქციები იზრდება. პროექტის თანახმად, სატრანსპორტო საშუალების ნასვამ მდგომარეობაში მართვის შემთხვევაში, მძღოლს 200 ლარით დაჯარიმების ნაცვლად, ერთი წლის ვადით მართვის უფლებას ჩამოართმევენ, თუ კი ამას 18 წელს მიუღწეველი მართვის უფლების მქონე პირი გააკეთებს, მას მართვის უფლება 2 წლით ჩამოერთმევა, ნაცვლად 1 წლისა რასაც ადმინისტრაციულ სამართალდარღვევათა კოდექსი სადღეისოდ ითვალისწინებს. ნასვამ მდგომარეობაში მანქანის მართვის შემთხვევაში, განსაკუთრებული გარემოებების გამოვლენისას, საქმის განმხილველ ორგანოს შეუძლია, სატრანსპორტო საშუალების მართვის უფლების ჩამორთმევა 700 ლარიანი ჯარიმით შეცვალოს.
ასევე „ადმინისტრაციულ სამართალდარღვევათა კოდექსში“ შედის შემდეგი სახის ცვლილება: სამსახურებრივი მოვალეობის შესრულების დროს სამართალდამცავი ორგანოს თანამშრომლის, სამხედრო მოსამსახურის, სახელმწიფო დაცვის სპეციალური სამსახურის თანამშრომლის ან აღსრულების პოლიციელის კანონიერი განკარგულებისადმი ან მოთხოვნისადმი ბოროტად დაუმორჩილებლობა, ასევე მათი სიტყვიერი შეურაცხყოფა ან მატ მიმართ შეურაცხმყოფელი ქმედების განხორციელება გამოიწვევს დაჯარიმებას 2000 ლარის ოდენობით ან ადმინისტრაციულ პატიმრობას 15 დღემდე ვადით.
რეალურად ეს სამართალდამცავი ორგანოების უფლებამოსლების გაზრდას ნიშნავს. როდესაც დაახლოებით იგივე მცდელობა ჰქონდა „ნაციონალურ მოძრაობას“ რამდენიმე წლის წინ, მათ ამ სურვილს საზოგადოებისა და ოპოზიციის მხრიდან საკმაოდ მწვავე რეაგირება მოჰყვა. ამიტომ მნიშვნელოვანია რატომ დადგა ახლა ეს დღის წესრიგში და რას შეიძლება ემსახურებოდეს. – წერს გაზეთი „რეზონანსი“.
10.07.13
