პარლამენტმა მესამე მოსმენით სიგარეტზე აქციზის განაკვეთის გაზრდასთან დაკავშირებული კანონპროექტი დაამტკიცა. საგადასახადო კანონმდებლობაში ცვლილებები ცნობილი ცოტა ხნის წინ გახდა. კანონპროექტის მიღება ითვალისწინებს, რომ 2016 წლის დადგომასთან ერთად ფასები გაიზარდება როგორც ფილტრიან, ასევე, უფილტრო სიგარეტზე.
ფინანსთა სამინისტროში სიგარეტის გაძვირებასთან თამბაქოს ნაწარმზე აქციზის გადასახადის განაკვეთის ზრდასთან კავშირს გამორიცხავენ.
“ზოგიერთ სიგარეტის სახეობის მნიშვნელოვან გაძვირებასთან არანაირი პირდაპირი კავშირი არ აქვს თამბაქოს ნაწარმზე აქციზის გადასახადის განაკვეთის ზრდას. ის ცალსახად უკავშირდება ბაზარზე ამ სიგარეტის სახეობის მიწოდება-მოთხოვნის მოცულობის დისბალანსს”, – აცხადებენ სამინისტროში.
სხვა მოსაზრება აქვს საქართველოში თამბაქოს ნაწარმის იმპორტიორ კომპანიებს. მათი განმარტებით, გაძვირების სავარუდო მიზეზი აქციზის მოსალოდნელი ზრდაა.
„ომეგა“ ის იმპორტიორი კომპანიაა, რომლის ნაწარმზეც ფასები უკვე გაიზარდა. დღეის მდგომარეობით “პარლამენტის” ღირებულება 10 ლარს, ხოლო “მარლბოროს” ღირებულება 8 ლარს შეადგენს. როგორც კომპანია “ბი და ჯი”-ს გაყიდვების მენეჯერმა ირაკლი თოლომაშვილმა განაცხადა, როდესაც სახელმწიფო აქციზის ფასის გაზრდას გეგმავს, სიგარეტის გაძვირება ჩვეულებრივი მოვლენაა.
“რამდენად გაზრდის სახელმწიფო აქციზის ფასს ვერ გეტყვით და იმის მიხედვით გავზრდით ჩვენც.” იმპორტიორი კომპანიების მიერ სიგარეტზე მომატებული ფასების გამო, გაჩნდა კითხევები, თუ რა ბედი ეწევა ქართულ სიგარეტს?
გაიზრდება თუ არა ფასები ქართულ ნაწარმზე და როგორ იმოქედებს კანონპროექტი ადგილობრივ მწარმოებელზე. მოსალოდნელ ცვლილებებთან დაკავშირებით დავუკავშირდით სააქციო საზოგადოება თბილისის თამბაქოს, რომელიც წარმოადგენს თამბაქოს პროდუქციის წამყვან მწარმოებელს საქართველოს ბაზარზე. მათი თქმით, ანალიტიკური სამსახური უკვე მუშაობს აღნიშნულ საკითხზე, მაგრამ ამჟამად არსებითი ცვლილებები ფასებთან დაკავშირებით არ იგეგმება.
„თბილისი თაიმსი“ მომხმარებლის პოზიციით დაინტერესდა. როგორც ერთ-ერთი სტუდენტი ამბობს, სიგარეტი, რომლის მომხმარებელიც იყო ორ-ნახევარჯერ გაძვირდა ეს კი მის დღიურ სახარჯო თანხაზე გაცილებით მეტია. თუმცა, სიგარეტის მოწევასზე თავის დანებებას არ გეგმავს.
„ბედის იღბლიანი დარტყმა ნამდვილად არ უნდა იყოს ის, რომ იაფფასიან სიგარეტზე მომიწევს ამ წელს გადასვლა. არც საახალწლო სასწაული მგონია… ოდესმე მაინც დავიბრუნებ ჩემს სიგარეტს,“ – ამბობს სტუდენტი ლევანი ბერიძე.
აღნიშნულ თემასთან დაკავშირებით,“თბილისი თაიმსი“ ექსპერტ მამუკა თორიას დავუკავშირდა და არსებული მდგომარეობის შეფასება სთხოვა.
„ზოგადად, აქციზების ფიქსირებული განაკვეთის ზრდა და შედეგად პროდუქციაზე ფასების მატება მეტად არაპოპულარული ნაბიჯია, რაც მოსახლეობის უდიდესი ნაწილი უარყოფითად ხვდება, მაგარამ ამჟამად ეს ნაბიჯი ობიექტური აუცილებლობითა გამოწვეული. კერძოდ, საბიუჯეტო შემოსავლების შემცირებით, რაც გამოწვეული იქნა იმპორტულ საქონელზე საბაჟო გადასახადების გაუქმებით,“ – განმარტავს ექსპერტი.
არსებული მდგომარეობის გათვალისწინებით, კანონპროექტის მიღება 2016 წლიდან ბიუჯეტის საშემოსავლო ნაწილს 90 მილიონი ლარით გაზრდის. ხელისუფლება თამბაქოზე კონტროლის გაძლიერებასა და აქციზირებული განაკვეთის ზრდას ევროკავშირის კანონმდებლობასთან დაახლოების მიზნით ხსნის.
ნანა მაღლაკელიძე