საქართველოს საგარეო საქმეთა მინისტრმა მიხეილ ჯანელიძემ გაცნობითი ხასიათის შეხვედრა გამართა საქართველოში ევროკავშირის წარმომადგენლობის ხელმძღვანელთან, ელჩთან იანოშ ჰერმანთან.
მხარეებმა, ისაუბრეს ასოცირების დღის წესრიგით გათვალისწინებული რეფორმების ეფექტიანიგანხორციელების მექანიზმებსა და საქართველო-ევროკავშირს შორის სავიზო რეჟიმის ლიბერალიზაციის მნიშვნელობაზე. შეხვედრაზე ასევე ხაზი გაესვა ევროკავშირის როლს საქართველოში კონფლიქტის მშვიდობიანი გადაწყვეტის პროცესში, მათ შორის, ევროკავშირის სადამკვირვებლო მისიის ფუნქციონირებით.
შეხვედრისას ყურადღება გამახვილდა საქართველოს რეგიონალურ და სატრანზიტო მნიშვნელობაზე და ამ მიმართულებით ქვეყანაში განხორციელებულ რეფორმებზე. მხარეებმა, ასევე, მიმოიხილეს ევროინტეგრაციის საკითხთა კომუნიკაციის სტრატეგიის ფარგლებში 2016 წელს დაგეგმილი ღონისძიებები.
დასასრულს, იანოშ ჰერმანმა მიხეილ ჯანელიძეს წარმატებები უსურვა სამომავლო საქმიანობაში, ახალ თანამდებობაზე. მხარეები შეთანხმდნენ, რომ გააგრძელებენ აქტიურ თანამშრომლობას საქართველოს ევროინტეგრაციის დღის წესრიგის წარმატებით განხორციელების მიზნით.
