ყუბანის მიტროპოლიამ თავის ოფიციალურ საიტზე სპეციალური განცხადება გაავრცელა, რომელშიც მორწმუნეებს შეახსენა იმ ღვთისმსახურებებში მონაწილეობის მიღების დაუშვებლობა, რომლებიც ტარდება ახალი-ათონის მონასტერში. ამ თემას სპეციალური პრესკონფერენციაც მიეძღვნა რომელზეც ყუბანის მიტროპოლიტის განცხადება გაავრცელდა.
განცხადებაში მიტროპოლიტი მომლოცველებს უკრძალავს აფხაზეთში ახალი-ათონის ტაძარში ლოცვას, რადგან „დოროთესა და ანდრეის, რომლებიც იმყოფებიან განხეთქილებაში მართლმადიდებელ ეკლესიასთან, არა აქვთ საეკლესიო მღვდელმსახურების ჩატარების უფლება“. ყუბანის მიტროპოლიტის განცხადების ტექსტს უცვლელად გთავაზობთ
„სავალალოა, რომ ისტორიული ახალი-ათონის მონასტერი აღმოჩნდა იმ პირთა ხელში, რომლებმაც გაწყვიტეს ერთობა მართლმადიდებელ ეკლესიასთან. მოსკოვის საპატრიარქო გამოხატავს ღრმა სინანულს, რომ მონასტერში, რომელიც აგებულია რუსეთის საიმპერატორო ოჯახის პირადი სახსრებით, კეთილმოწყობილია და თავის დროზე დასახლებული რუსი ბერებით, ხოლო ახალ დროებაში აღდგენილია „რუსეთის სახელმწიფოსა და რუს შემომწირველთა გადამწყვეტი მონაწილეობით და ფინანსური მხარდაჭერით“, დღეს არ შეუძლიათ ლოცვა რუსეთის მართლმადიდებელი ეკლესიის მორწმუნეებს”.
განცხადებაში განმარტებულია, რომ საქმე ეხება მაიკოპის ეპარქიის ყოფილ კლირიკოსებს – ბერმონაზვნებს: დბარსა და ამპარს, რომლებსაც 2011 წელს ჰქონდათ აღკვეთილი მღვდელმსახურება განხეთქილებისა და დაუმორჩილებლობისთვის ზემდგომ სასულიეროთა მიმართ.
„შეშფოთება გამოწვეულია მცირედი ხნის წინ მომხდარი „აფხაზეთის წმიდა მიტროპოლიის“ იურიდიული რეგისტრაციით – განხეთქილების ორგანიზაციით, რომელსაც უძღვებიან ზემოაღნიშნული ბერები“ – აღნიშნავენ ყუბანის მიტროპოლიაში.
ეკლესია არაერთგზის მოუწოდებდა მათ სინანულისკენ. სინანულის არარსებობის და განხეთქილებაში მყოფობის გამო ბერმონაზვნებს: დოროთეს (დბარი) და ანდრეის (ამპარი) მღვდელმსახურების აკრძალვა გაუგრძელდათ 2012 წელს.
„ამრიგად, დღეისათვის ბერმონაზვნებს: დოროთესა და ანდრეის, რომლებიც იმყოფებიან განხეთქილებაში მართლმადიდებელ ეკლესიასთან, არა აქვთ საეკლესიო მღვდელმსახურების ჩატარების უფლება. მართლმადიდებელ მომლოცველებს არ ეძლევათ ახალი-ათონის მონასტერში საეკლესიო საიდუმლოებაში და მათთან ერთობლივ თანალოცვაში მონაწილეობის კურთხევა“ – იუწყება მიტროპოლია.
აღსანიშნავია, რომ აფხაზურ ეკლესიაში არის განხეთქილება. ერთი ნაწილი, რომელსაც აფხაზეთის დე-ფაქტო ხელისუფლებას უჭერს მხარს, რუსეთის ეკლესიასთან მჭიდრო ურთიერთობის მომხრეა, ხოლო მეორე ნაწილი თვლის, რომ „ავტოკეფალიის აღდგენა“ შესაძლებელია, მხოლოდ კონსტანტინოპოლის საპატრიარქოს დახმარებით.
დაპირისპირება იმდენად მწვავეა, რომ მან განხეთქილება საზოგადოებაშიც შეიტანა. „აფხაზეთის მიტროპოლიამ“ რუსეთის საპატრიარქო და მისი მხარდამჭერი „აფხაზეთის მართლმადიდებელი ეკლესია“ ფინანსურ მაქინაციებშიც დაადანაშაულა.
11.07.13
Discussion about this post