ბრიუსელში კონფერენცია – “საქართველოს, მოლდოვას და უკრაინის მიერ პოლიტიკური რეფორმების განხორციელებაში მიღწეული პროგრესი” გაიმართა, რომელშიც ევროკავშირის მაღალი რანგის ოფიციალური პირები – ევროპარლამენტისა და შესაბამისი ეროვნული პარლამენტის წევრები მონაწილეობდნენ.პარლამენტის პრესსამსახურის მიერ გავრცელებული ინფორმაციით, ექსპერტებმა სამი ქვეყნიდან მიმდინარე რეფორმები შეაფასეს და სამომავლო გეგმებზე იმსჯელეს. კონფერენცია ევროპარლამენტის საგარეო ურთიერთობათა კომიტეტის, ევრონესტის საპარლამენტო ასამბლეის (ევრონესტის ბიუროს პატრონაჟით) და ღია საზოგადოების ფონდის ორგანიზებით ჩატარდა.
ვიქტორ დოლიძემ ბრიუსელში, ევრონესტისა და სამოქალაქო სექტორის თანამშრომლობის შედეგად გამართული ღონისძიება დადებითად შეაფასა.
“ამას უნდა მოყვეს განგრძობადობა. მიმდინარე პროცესზე, მისი ეფექტურობის გაზრდის თვალსაზრისით, უნდა მოხდეს მაქსიმალური საპარლამენტო მონიტორინგი. ამ გამოწვევებთან ერთად ჩვენს ქვეყნებს რეფორმების გატარების მეტი შესაძლებლობები ეძლევა, რისთვისაც საჭიროა პოლიტიკური ნება და თანმიმდევრული ნაბიჯების გადადგმა, სექტორალური რეფორმების გატარების მიზნით”, – განაცხადა ევრონესტის საპარლამენტო ასამბლეის თანა პრეზიდენტმა ვიქტორ დოლიძემ.
ღონისძიებაზე მისასალმებელი სიტყვით გამოვიდნენ: ევროპარლამენტის საგარეო ურთიერთობათა კომიტეტის თავჯდომარე ელმარ ბროკი, ევროკომისარი სამართლისა და გენდერული თანასწორობის კუთხით ვერა ჯუროვა, ევროკავშირის საგარეო ქმედებათა სამსახურის გენერალური მდივნის მოადგილე ჰელგა შმიდტი, რეგიონალური პოლიტიკის გენერალური დირექტორატის მოადგილე კატერინა მატერენოვა და ევროკავშირისა და უკრაინის სამოქალაქო საზოგადოების პლატფორმის თანათავმჯდომარე ალექსანდრ სუშკო.
გამომსვლელებმა მიგრაციის პრობლემაზე, კლიმატის ცვლილებაზე და უსაფრთხოებაზე ისაუბრეს. კონფერენციაზე, უკრაინის რთულ სიტუაციაში ყოფნის მიუხედავად, ამ ქვეყნის მიღწევებს გაესვა ხაზი. აღინიშნა ისიც, რომ ჯერ კიდევ ძალიან ბევრია გასაკეთებელი ასოცირების შესახებ შეთანხმების იმპლემენტაციის კუთხით.
შეხვედრისას ასევე ისაუბრეს ვიზა ლიბერალიზაციის პროცესზე და გასულ წელს გამოქვეყნებულ პროგრესის ამსახველ ანგარიშებზე, სადაც საქართველოს მიღწევებზე ისაუბრეს. მოლდოვასთან მიმართებაში აღინიშნა, რომ მიუხედავად ცუდი ეკონომიკური კლიმატისა, ქვეყნის 460 000 ადამიანმა უკვე ისარგებლა უვიზო რეჟიმით. აღინიშნა ისიც, რომ მოლდოვას პოლიტიკური და კორუფციული პრობლემების მიუხედავად, გაიზარდა მოლდოვას ექსპორტი ევროპაში. საუბარი შეეხო სამეზობლო პოლიტიკის ახალ ანგარიშს, რომლის ძირითადი მიზანია – ძლიერი სამეზობლო და აქტიური თანამშრომლობა.
შეხვედრისას ასევე ისაუბრეს ვიზა ლიბერალიზაციის პროცესზე და გასულ წელს გამოქვეყნებულ პროგრესის ამსახველ ანგარიშებზე, სადაც საქართველოს მიღწევებზე ისაუბრეს. მოლდოვასთან მიმართებაში აღინიშნა, რომ მიუხედავად ცუდი ეკონომიკური კლიმატისა, ქვეყნის 460 000 ადამიანმა უკვე ისარგებლა უვიზო რეჟიმით. აღინიშნა ისიც, რომ მოლდოვას პოლიტიკური და კორუფციული პრობლემების მიუხედავად, გაიზარდა მოლდოვას ექსპორტი ევროპაში. საუბარი შეეხო სამეზობლო პოლიტიკის ახალ ანგარიშს, რომლის ძირითადი მიზანია – ძლიერი სამეზობლო და აქტიური თანამშრომლობა.
კონფერენციის მსვლელობისას, გამომსვლელებმა 2015 წელი შეაჯამეს. მათ ისაუბრეს იმ სირთულეებზე და პოზიტურ პროგრესზე რომელიც უკრაინაში, საქართველოში და მოლდოვაში იყო მიღწეული. ყურადღება გამახვილდა სამ ქვეყანაში მიმდინარე სასამართლო რეფორმებსა და კანონის უზენაესობაზე.
სამოქალაქო საზოგადოების ფონდის ქართველმა ექსპერტებმა ყურადღება გაამახვილეს პარლამენტის როლზე, როგორც ასოცირების ხელშეკრულების იმპლემენტაციის პროცესის მაკონტროლებელზე და ამ თვალსაზრისით, მათ საკანონმდებლო ორგანოს გაძლიერებისკენ მოუწოდეს.
კონფერენციის მეორე ნაწილი ანტიდისკრიმინაციული და თანაბარი მოპყრობის საკითხს დაეთმო, სადაც გიორგი ჟვანიამ ქართველი ექსპერტების მიერ მომზადებული ანგარიში გააკრიტიკა.
კონფერენციის ბოლო ნაწილი კორუფციის წინააღმდეგ ბრძოლის პრობლემებს დაეთმო, სადაც ძირითადად უკრაინის საკითხი განიხილეს.
“კორუფციასთან ბრძოლა საწყისია ყველა ცვლილების, განსაკუთრებით უკრაინის და არა მარტო უკრაინის. კორუფციასთან გამარჯვება ქვეყნის გამარჯვებაა,” – განაცხადა ევროპის კორუფციის წინააღმდეგ ბრძოლის ოფისის გენერალურმა დირექტორმა ჯოვანი კესლერმა.
კონფერენციაში, ვიქტორ დოლიძის ხელმძღვანელობით, ევრონესტის საპარლამენტო ასამბლეის წარმომადგენლები ანი მიროტაძე, გია ჟორჟოლიანი, ფრიდონ საყვარელიძე, გიორგი ჟვანია, გიორგი კანდელაკი და თინათინ ბოკუჩავა ასევე ევროპასთან ინტეგრაციის კომიტეტის თავმჯდომარე ლევან ბერძენიშვილი და სუამის დელეგაციის ხელმძღვანელი ზურაბ აბაშიძე მონაწილეობდნენ.
