საქართველოს მართლმადიდებელი ეკლესია დღეს “წმინდა დიდებულთა ათორმეტთა მოციქულთა კრებას” – სვეტიცხოვლობას აღნიშნავს.
დღესასწაულთან დაკავშირებით სრულიად საქართველოს კათოლიკოს-პატრიარქი, უწმინდესი და უნეტარესი, ილია II სადღესასწაულო წირვას სვეტიცხოვლის საკათედრო ტაძარში ასრულებს.
სვეტიცხოვლის დღესასწალთან დაკავშირებით ტაძარში სხვადასხვა ეკლესია-მონასტრების სასულიერო პირები და ბერ-მონაზვნები იმყოფებიან. ამ წუთებში, ტაძარში წმინდა სახარებიდან ადგილი წაიკითხეს, სადაც უფლის მიერ 12 მოციქულის გამორჩევის შესახებ არის საუბარი.
საღმრთო ლიტურგიის დასრულების შემდეგ, კათოლიკოს-პატრიარქი მრევლს ტრადიციული ქადაგებით მიმართავს და დღევანდელ დღეს მიულოცავს.
სვეტიცხოვლობის დღესასწაული წელიწადში ორჯერ, 14 ოქტომბერს და 13 ივლისს აღინიშნება. 14 ოქტომბერს ქრისტეს კვართს მოიხსენიებენ, 13 ივლისს კი – ქრისტეს ყველა მოციქულს.
როგორც ცნობილია, მოციქულთა სწორის, წმინდა ნინოს რჩევით, მეფე მირიანმა კვართისა საუფლოჲსა და სვეტისა ღმრთივბრწყინვალისა და მირონმდინარისა”-ს ადგილზე ხის ეკლესია ააგო. მისი დანგრევის შემდეგ V საუკუნის მე-2 ნახევარში, წმინდა მეფე ვახტანგ გორგასალმა ბაზილიკის ტიპის ტაძარი აღმართა. XI სუკუნეში კი დაზიანებული ბაზილიკის ადგილზე ქართლის კათოლიკოსმა მელქისედეკმა ააგო ახალი ტაძარი – სვეტიცხოველი, რომლის ხუროთმოძღვარიც არსუკიძე იყო.
13.07.13
