სომხეთის პრეზიდენტობის კანდიდატი და მითოლოგიის ექსპერტი – ვარდან სედრაკიანი ცნობილია თავისი ეპატაჟური განცხადებებით. ამჯერად ქართული მედიასივრცე მისმა რამდენიმე წლის წინანდელმა კომენტარმა დაიპყრო, რომელშიც ის სომხეთის საგარეო პოლიტიკას ეხება.
,,2008 წელს ,,სამხრეთ ოსეთში“ მიმდინარე ომისას ჩვენ კარგი შესაძლებლობა გვქონდა სამცხე ჯავახეთში ჩვენი ჯარი შეგვეყვანა. მაშინ საქართველო სომხური ჯარის გასაყვანად უფრო მეტ დათმობაზე წამოვიდოდა ჩვენთან, მათ შორის ამ რეგიონის სტატუსთან დაკავშირებით. შეგვეძლო მიგვეღწია იმისთვის, რომ ყველა ადგილობრივ ორგანოში მმართველი სომეხი ყოფილიყო” – განაცხადა სედრაკიანმა.
პრეზიდენტობის კანდიდატი იმედს გამოთქვამდა და გამოთქვამს, რომ მსგავსი შესაძლებლობა სომხეთს კიდევ მიეცემა. ამ ინტერვიუმ მთლიანი ქართული მედიასივცრე დაიპყრო. კომენტარი 2012 წელს დაიდო სააგენტო ,,რეგნუმზე“ და იმთავითვე გამოიწვია დიდი აღშფოთება საქართველოს მოსახლეობაში.
სხვა ინტერვიუში ის აცხადებდა, რომ: ,,ამ შანსის მოცემაზე მეტყველებს საქართველოს პრემიერ-მინისტრის ბიძინა ივანიშვილის ცოტახნისწინანდელი განცხადება სომხებზე.“ თუმცა ივანიშვილის რა განცხადებას გულისხმობდა ვარდან სედრაკიანი ეს არ დაუკონკრეტებია.
პრეზიდენტობის კანდიდატსა და მითოლოგიის ექსპერტ – ვარდან სედრაკიანს საქართველოსთან მიმართებით არაერთი მსგავსი ეპატაჟური განაცხადი ეკუთვნის. მაგალითად: ,,ის რომ სომხეთს არ შეუძლია სამხრეთ ოსეთის და აფხაზეთის დამოუკიდებლობის აღდგენა, არ შეესაბამება სიმართლეს. თუ სომხეთი მსოფლიოს არცახის (მთიანი ყარაბაღის) დამოუკიდებლობის აღიარებას თხოვს, მაშინ იგივე ლოგიკით, სამხრეთ ოსეთისა და აფხაზეთის დამოუკიდებლობაც უნდა აღიაროს.“
ვარდან სედრაკიანმა ასევე განაცხადა, რომ დღევანდელი აფხაზეთი ძველი აფხაზეთის სამეფოს ნაწილია. ხოლო ძველად აფხაზეთის სამეფოს, რომელსაც სომხური სამეფო დინასტიის ბაგრატუნების ერთ-ერთი შტო მართავდა, დედაქალაქი ქუთაისში ჰქონდა. ამიტომ, სედრაკიანის თქმით, საჭიროა „აფხაზეთის ტერიტორიული მთლიანობის აღდგენა და დედაქალაქის ქუთაისში დაბრუნება.“ ეს, მისი თქმით, ღმერთისა და სინდისის წინაშე სამართლიანობის აღდგენის საკითხია. სედრაკიანი ასევე მიიჩნევს, რომ ჯავახეთი სომხეთს უნდა შეუერთდეს, ხოლო რუსეთსა და სომხეთს საერთო საზღვარი უნდა ჰქონდეთ.
სომხეთის პრეზიდენტობის კანდიდატი ხშირად აცხადებს, რომ გამარჯვების შემთხვევაში, აფხაზეთისა და სამხრეთ ოსეთის დამოუკიდებლობას აღიარებს.
როგორც კულუარებიდან ირკვევა, სედრაკიანის კანდიდატურას სერიოზულად არავინ აღიქვამს და ის მედიის ყურადღებას მხოლოდ სენსაციური განცხადებებით იპყრობს.
