პარლამენტის ეთიკის კოდექსისა და ზოგადად პარლამენტართა ქცევის წესების შესახებ მსჯელობდნენ გუშინ თბილისში, სასტუმრო „ჰოლიდეი ინში“ გამართულ სემინარზე.
სემინარზე განიხილეს საპარლამენტო ეთიკის საკითხი ეუთოს რეგიონსა და საქართველოში. სემინარი გახსნა საქართველოს პარლამენტის თავმჯდომარემ, დავით უსუფაშვილმა.
მისი განცხადებით, „უნდა მოიძებნოს ის მექანიზმები, რომელიც ყველაზე უფრო ადეკვატური იქნება ჩვენი რეალობისთვის. პარლამენტის წევრს არ უნდა შევუზღუდოთ სიტყვის თავისუფლება და მოსაზრების გამოთქმის თავისუფლება და რაიმე სანქციის შიშით ადამიანი არ უნდა იყოს დათრგუნული, შესაბამისად ეთიკის ნორმები და ქცევის სტანდარტები არ უნდა აღმოჩნდეს არასწორი ინსტრუმენტი უმრავლესობის მხრიდან უმცირესობასთან გამკლავების, ან ერთი ჯგუფის მიერ მეორე ჯგუფთან ურთიერთობის გარკვევის საშუალება, ამიტომ მექანიზმებიც მნიშვნელოვანია. შესაძლოა ჟურნალისტებსაც და საზოგადოებასაც ახალისებს ხოლმე გადაცდომები დეპუტატების მხრიდან, მაგრამ ეს საბოლოო ჯამში ძვირად გვიჯდება, იმიტომ რომ გადაწყვეტილებებს ხარისხი აკლდება და პოლიტიკური პროცესისადმი ნდობა ეცემა“.
ეუთოს დემოკრატიული ინსტიტუტებისა და ადამიანის უფლებების ოფისის დემოკრატიული მმართველობისა და გენდერის განყოფილების უფროსმა, მარჩინ ვალეცკიმ სემინარზე პროფესიული ეთიკური სტანდარტების შესახებ საბაზისო კვლევისა და საერთაშორისო გამჭვირვალობის კვლევის შედეგების თაობაზე ისაუბრა, ასევე წარმოდგენილი იყო საქართველოს პარლამენტის ეთიკის კოდექსი, რომელიც საქართველოს პარლამენტმა 2004 წელს მიიღო, ისაუბრეს რეფორმის აუცილებლობის შესახებ.
„დღევანდელ პატრლამენტში დიკუსიები ჩვეულებრივი ნორმაა, დებატები არის მწვავე, პოლიტიკური ინტერესების კონფლიქტი და შეჯახება საკმაოდ მკაფიოდაა გამოხატული, ეს ყველაფერი პარლამენტს აქცევს პარლამენტად, მაგრამ იმისთვის, რომ ჩვენი საქმიანობა იყოს გარკვეულ ჩარჩოებში მოქცეული და იმისთვის, რომ საზოგადოება უყურებდეს საგნობრივ დებატებს და არა პერსონალურ გარჩევებს, ჩვენ არ გვავიწყდებოდეს, რომ მოქალაქეების წარმომადგენლები ვართ და შესაბამისად საზოგადოების ინტერესი უნდა იყოს მნიშვნელოვანი ჩვენს გადაწყვეტილებებში, ჩვენც უნდა დავამკვიდროთ ის ნორმები და სტანდარტები, რომლებიც მსოფლიოს ბევრ პარლამენტშია დამკვიდრებული, მაგრამ ჩვენ არ გავაკეთებთ იმას, რომ 2004 წელს მიღებული და მერე დავიწყებული დოკუმენტის ნაცვლად ახლა მივიღოთ დოკუმენტი, რომელსაც ასევე დავივიწყებთ ძალიან მალე. ჩვენ უნდა გამოვძებნოთ ის მექანიზმები, რომელიც ყველაზე უფრო ადეკვატური იქნება ჩვენი რელობისთვის და ცხოვრებაში დაგავნახებს, რომ ეს მუშაობს“, – განაცხადა პარლამენტის თავმჯდომარემ, დავით უსუფაშვილმა.
დღევანდელ სხდომაზე ასევე ისაუბრეს ეუთოს რეგიონში დეპუტატებისათვის საპარლამენტო სტანდარტების დამკვიდრების დადებითი პრაქტიკის შესახებ, ასევე დეპუტატებისათვის პროფესიული და ეთიკური სტანდარტების ეფექტიანად განხორციელებისა და საქართველოში კოდექსის რეფორმის მაგალითებისა და წინ გადაგმული ნაბიჯების შესახებ.
სემინარის მუშაობაში მონაწილეობდნენ საპარლამენტო უმრავლესობისა და უმცირესობის წევრები, საერთაშორისო და არასამთავრობო ორგანიზაციების წარმომადგენლები.
სემინარი გაიმართა საერთაშორისო გამჭვირვალობა-საქართველოსა და ეუთოს დემოკრატიული ინსტიტუტებისა და ადამიანის უფლებების ოფისის (ODIHR) ორგანიზებით.
16.07.13
