საქართველოს რეგიონული განვითარებისა და ინფრასტრუქტურის სამინისტრო, საერთაშორისო განვითარების სააგენტოსა (USAID) და ინფორმაციის თავისუფლების განვითარების ინსტიტუტთან (IDFI) ერთად ახალ საპილოტე პროექტს იწყებს. საქართველოს რეგიონული განვითარებისა და ინფრასტრუქტურის სამინისტროს ინფორმაციით, პროექტის მიზანი სამინისტროსთვის ანტიკორუფციული ჩარჩო დოკუმენტის შექმნაა. “აღნიშნული პროექტი პირველი პრეცედენტია საჯარო სივრცეში და იგი საერთაშორისო განვითარების სააგენტოს (USAID) ეფექტიანი მმართველობის პროგრამის ფარგლებში განხორციელდება”, – აცხადებენ სამნისტროში. მათივე ინფორმაციით, საქართველოს რეგიონული განვითარებისა და ინფრასტრუქტურის სამინისტროში პირველი შეხვედრა შედგა. შეხვედრას ესწრებოდნენ მინისტრის პირველი მოადგილე ილია დარჩიაშვილი, მოადგილე ეკა სეფაშვილი და სამინისტროს საქვეუწყებო დაწესებულების ხელძღვანელი პირები. შეხვედრაზე ახალი ანტიკორუფციული პროექტის შესახებ იმსჯელეს. “პროექტის ძირითადი მიზანი ამომწურავი ანალიზის საფუძველზე კორუფციის რისკების იდენტიფიცირება და იმ ინდიკატორების შემუშავებაა, რომელიც მიღწეული პროგრესის წარმატებულ მონიტორინგს უზრუნველყოფს”, – განმარტავენ სამინისტროში.