ღვინის ტურიზმის ასოციაციამ მემორანდუმი გააფორმა გადამზიდავ კომპანია TNT-სთან. შეთანხმებას ხელი მოაწერეს ღვინის ტურიზმის ასოციაციის გამგეობის თავმჯდომარემ, ელენე ბუხაიძემ და კომპანია TNT-ს გენერალურმა დირექტორმა, ნინო მენთეშაშვილმა.
არა ერთ მცირე თუ საშუალო მარანს უამრავი ღვინის ექსპორტის თნმდევი ბიუროკრატიული პრობლემა ექმნება ხოლმე, რომელთა გადაჭრა სპეციალურ ცოდნასა და გამოცდილებას მოითხოვს. მემორანდუმის მიზანი კი გახლავთ ამ კონკრეტული პრობლემების მოგვარება, ექსპორტის გამარტივება ღვინის მარნებისთვის და, ზოგადად, ქართული ღვინის პოპულარიზაცია, მცირე და საშუალო მეღვინეობების ხელშეწყობა საქართველოში და მის ფარგლებს გარეთ.
ურთიერთთანამშრომლობის ფარგლებში ღვინის ტურიზმის ასოციაცია დაინტერესებულ მარნებს სთავაზობს კომპანია TNT-ს მომსახურების სპეციალურ პირობებს, მათ შორის, საქართველოდან საერთაშორისო გზავნილების „ხელიდან ხელში“ მიწოდების სერვისს მსოფლიოს 200-ზე მეტ ქვეყანაში.
„მოლაპარაკება რომელიც ასე წარმატებით შედგა ღვინის ტურიზმის ასოციაციასა და TNT-ს შორის დიდი ნახტომი იქნება ღვინის ექსპორტის განვითარებისთვის . „კარიდან კარამდე“ სერვისი უზრუნველყოფს ყველა იმ ბიუროკრატიული და ლოჯისტიკური პრობლემების გაიოლებას რაც ზოგადად ტრანსპორტირებას თან ახლავს. მხოლოდ ღვინის ტურიზმის ასოციაციის მეშვეობით შეუძლია მეღვინეს ღვინის გადაზიდვის დროს „კარიდან კარამდე“ სერვისის განსაკუთრებული შემოთავაზების მიღება, ჩვენც ჩვენს პოზიციებს ვამყარებთ და მიღწეული მოლაპარაკებას და შემოთავაზებული პირობების ექსკლუზივით ვსარგებლობთ“ – აღნიშნავს ღვინის ტურიზმის ასოციაციის ერთ-ერთი დამფუძნებელი, ლევან ჩუბინიძე ღვინის საინფორმაციო ცენტრთან საუბარში.
მარიამ ტაკაშვილი
