ირანში ჩასულ ქართველ ჟურნალისტებთან შეხვედრისას თავრიზის უნივერსიტეტის კავკასიოლოგიის კვლევების ხელმძღვანელმა – აჰმად ფარშბაფიანმა გარკვეულ პოლიტიკურ ასპექტებზეც ისაუბრა. ჟურნალისტების დასმულ კითხვაზე, თუ რას ფიქრობდა რამდენიმე წლის წინ საქართველოს მხრიდან ირანისათვის სანქციების დაწესებაზე, მან თქვა, რომ ამერიკის მხრიდან ერთგვარი წაქეზების გამო მოხდა ეს და დღეს მოხარულია ორმხრივი თანამშრომლობის გაღრმავებითა და სანქციების მოხსნით.
აჰმად ფარშბაფიანმა ირანის ეკონომიკური წინსვლის შესახებ ისაუბრა და პარალელები საქართველოსთანაც გაავლო:
,,საბჭოთა რეჟიმის გაუქმების შემდეგ, საქართველომ ნელ-ნელა შეძლო ფეხზე წამოდგომა, მაგრამ სრულად წელში გამართვას რამდენიმე დამაბრკოლებელი მიზეზი ახლდა – მათ შორის, რუსეთი და ამერიკა.
მართალია, ირანი დიდი და ისტორიული ქვეყანაა, მაგრამ ეს არასდროს ყოფილა იმის მიზეზი, რომ ფეხზე დამდგარიყო. ჰომეინის სლოგანი იყო: ,,არც მარჯვნივ, არც მარცხნივ“ – ანუ არც აღმოსავლეთი და არც დასავლეთი. ჩვენ ჩვენივე თავის უნდა გვწამდეს.
ამის მერე ჩვენ დავიჯერეთ, რომ ჩვენი გადამრჩენელი არავინაა, გარდა ჩვენივე თავისა და ისლამური გზისა.
აშშ საქართველოსგან ხეირის მიღებას ცდილობს, ასეა რუსეთიც. საქართველო რეგიონში დღეს მარტოა და არავისგან არ უნდა ელოდოს დახმარებას.“
აჰმად ფარშბაფიანის შეფასებით, აუცილებელია რომ საქართველომ განვითარებისათვის ყველა გზა გამოიყენოს, უპირველეს ყოვლისა, განათლება. მისი თქმით, აუცილებელია, რომ ქვეყანამ გამოიყენოს მასწავლებლებისა თუ მეცნიერების ცოდნა.
,,ჩვენ სწორედ ამ გზით დავიწყეთ განვითარება და დღევანდელ წინსვლას სწორედ ასე მივაღწიეთ“ – აღნიშნა ფარშბაფიანმა.
კავკასილოგიის კვლევების მიმართულების ხელმძღვანელმა ამერიკასთან ურთიერთოებებზეც ისაუბრა და აღნიშნა, რომ აშშ-ს ეშინია, რომ ირანი განვითარდება და რეგიონში სრულ დამოუკიდებლობას მოიპოვებს.
ფარშბაფიანი აგრეთვე ISIS-ს შეეხო და აღნიშნა, რომ მათი ქვეყანა ყველაფერს აკეთებს, რომ შეაჩეროს ისლამური სახელმწიფო. თუმცა, მისი თქმით, ამას სხვა ქვეყნების დახმარებაც სჭირდება.
,,ISIS-ს მთავარი მხარდამჭერები აშშ, ისრაელი და ევროპა იყვნენ, თუმცა, ევროპაში ბოლო დროს განვითარებულმა მოვლენებმა (ტერაქტები), ეს მხარე მხარდამჭერთა რიგს ჩამოაშორა. ასე, რომ დღეს, ისლამური სახელმწიფოს მხარდამჭერებად მხოლოდ აშშ და ისრაელი მოისაზრება. მე თავისუფლად შემიძლია ვთქვა, რომ საქართველოც საფრთხის ქვეშაა“- აღნიშნა აჰმედ ფარშბაფიანმა.
ნატალია ჯალაღონია
