გარემოსა და ბუნებრივი რესურსების დაცვის სამინისტროში, ხვალ საქართველოში მოქმედ საერთაშორისო დონორებთან შეხვედრა გაიმართება.
გარემოს დაცვის სამინისტროს ცნობით, შეხვედრაზე საქართველოს გარემოსა და ბუნებრივი რესურსების დაცვის სამინისტროს სახელითა და ავსტრიის ტექნიკური თანამშრომლობის სააგენტოს დახმარებით შემუშავებულ ეროვნულ სატყეო პოლიტიკის დოკუმენტთან ერთად განხილული იქნება საერთაშორისო ორგანიზაციებთან და დონორებთან სატყეო სექტორში სამომავლო თანამშრომლობის მიმართულებები და პერსპექტივები.
ეროვნული სატყეო პოლიტიკის დოკუმენტი განსაზღვრავს ქვეყნის სატყეო პოლიტიკას საქართველოს ყველა ტყისათვის, მიუხედავად მათი საკუთრებისა და მართვის ფორმისა და მოიცავს ყველა იმ ასპექტს, რაც მნიშვნელოვანია ქვეყანაში ტყეების მდგრადი მართვის პრაქტიკის დასამკვიდრებლად.
დოკუმენტის ძირითადი პრიორიტეტებია – ტყის რესურსების რაციონალური გამოყენება, ტყის მფლობელობა, მართვა და სარგებლობის უფლება, ტყეების მდგრადი მართვა, ადაპტაცია კლიმატის ცვლილების ზემოქმედებასთან. გარდა ამისა, დოკუმენტი აყალიბებს ხედვას ისეთ მნიშვნელოვან საკითხებზე როგორიცაა: ტყეების მართვა და კანონმდებლობა; განათლება და მეცნიერება; საზოგადოების ცნობიერება და ჩართულობა.
შეხვედრას გარემოს და ბუნებრივი რესურსების დაცვის მინისტრი ხათუნა გოგალაძე გახსნის.
18.07.13
