საერთაშორისო ინსტრუმენტებისა და ეროვნული კანონმდებლობის შესწავლის შედეგად, რელიგიის საკითხთა სახელმწიფო სააგენტოს მიერ შემუშავებულ იქნა რამდენიმე რეკომენდაცია რელიგიისა და რწმენის თავისუფლების ცალკეული საკითხების საკანონმდებლო უზრუნველყოფასთან დაკავშირებით. ერთი-ერთი მათგანი ეხება საჯარო სკოლებისა და მათ მომიჯნავე ტერიტორიებზე საკულტო – რელიგიური დანიშნულების შენობა – ნაგებობების მშენებლობის საკითხს.
რელიგიის სააგენტოს 2015 წლის ანგარიშში აღნიშნულია, რომ „რელიგიური გაერთიანებების ქონებრივი და ფინანსური საკითხების შემსწავლელი სარეკომენდაციო კომისიის“ მიერ ჩატარებული სხდომების ფარგლებში განხილული საკითხების შესწავლის შედეგად გამოვლინდა რელიგიური ზეგავლენისგან თავისუფალი განათლების ხელყოფის ფაქტები, რაც ვლინდება სკოლის ყოფილ, მაგრამ მასთან უშუალო შემხებლობის მქონე ტერიტორიაზე, როგორც რელიგიური სიმბოლიკის, ასევე საკულტო–რელიგიური დანიშნულების შენობა–ნაგებობის მშენებლობაში.
„არის შემთხვევები, როდესაც საჯარო სამართლის იურიდიული პირის სტატუსის მქონე ზოგადსაგანმანათლებლო დაწესებულებებმა კონკრეტული რელიგიური გაერთიანების სასარგებლოდ დათმეს სკოლის ტერიტორიის ნაწილი, საკულტო–რელიგიური დანიშნულების შენობა–ნაგებობის მშენებლობისათვის. კერძოდ, ასეთ შემთხვევებში, ხდება სკოლის ტერიტორიის ნაწილის გამოყოფა და ახალი რეგისტრაცია, რის შედეგადაც სკოლის ტერიტორიიდან გამოყოფილ ნაწილს ენიჭება ახალი საკადასტრო კოდი და ოფიციალურად ხდება სკოლის ტერიტორიის მომიჯნავე, თუმცა სკოლასთან უშუალო სიახლოვესა და შემხებლობში მყოფი, მიწის ნაკვეთი. აღნიშნული შემთხვევეი არღვევს ზოგადი განათლების შესახებ კანონის მე-3 და მე-18 მუხლებით გათვალისწინებულ პრინციპებს.“-ნათქვამია ანგარიშში.
აღნიშნულის დასადასტურებლად სააგენტო იშველიებს საქართველოს კანონის იმ ნაწილი, სადაც განსაზღვრულია ზოგადი განათლების სფეროში სახელმწიფო პოლიტიკის ძირითად მიზნები (მუხ. 3.1), რომელთა მისაღწევადაც სახელმწიფო უზრუნველყოფს საჯარო სკოლის დამოუკიდებლობას რელიგიური და პოლიტიკური გაერთიანებებისაგან (მუხ. 3.2.„გ“) და კრძალავს:
- სასწავლო პროცესის რელიგიური ინდოქტრინაციის, პროზელიტიზმის ან იძულებითი ასიმილაციისთვის გამოყენებას (მუხ. 13.2);
- საჯარო სკოლის ტერიტორიაზე რელიგიური სიმბოლოების განთავსება არ უნდა ემსახურებოდეს არააკადემიურ მიზნებს (მუხ. 18.3).
რელიგიის სააგენტო-„სკოლის ყოფილ, მაგრამ მასთან უშუალო შემხებლობის მქონე ტერიტორიაზე ხდება არათუ რელიგიური სიმბოლიკის, არამედ საკულტო-რელიგიური დანიშნულების შენობა-ნაგებობის მშენებლობა. აღნიშნული წარმოადგენს ეროვნული და საერთაშორისო კანონმდებლობით დაცული სიკეთის, რელიგიური ზეგავლენისგან თავისუფალი განათლების, ხელყოფას. შესაბამისად, სსიპ რელიგიის საკითხთა სახელმწიფო სააგენტოს მიზანშეწონილად მიაჩნია შეიქმნას რეგულირებისა და კონტროლის სათანადო სამართლებრივი მექანიზმები, რათა მომავალში მოხდეს მსგავსი შემთხვევების პრევენცია და არიდება.“
სოფიკო ნინიკაშვილი
