საქართველო კულტურული მემკვიდრეობის მიმართულებით მომუშავე უმსხვილესი საერთაშორისო ორგანიზაცია „ევროპა ნოსტრას“ ასოცირებული წევრი გახდა.
ქვეყანას საშუალება მიეცემა აქტიურად ჩაერთოს „ევროპა ნოსტრას“ საქმიანობაში – მიიღოს კონსულტაციები კულტურული მემკვიდრეობის მიმართულებით, ყოველწლიურად დაესწროს და ჩაერთოს ევროპული კულტურული მემკვიდრეობის კონგრესში, ხელი შეუწყოს საქართველოს კულტურული მემკვიდრეობის პოპულარიზაციას ევროპაში. საქართველო ევროპა ნოსტრასგან კულტურულ მემკვიდრეობაზე ზრუნვისა და დაცვის მიმართულებით, საუკეთესო გამოცდილებას მიიღებს.
როგორც “თბილისი თაიმსს” სამინისტროდან აცნობეს, კულტურის სამინისტრო ამ საკითხზე უკვე რამდენიმე თვეა აქტიურად მუშაობს; 2015 წლის დეკემბერში, საქართველოს კულტურისა და ძეგლთა დაცვის მინისტრის მოადგილე ლევან ხარატიშვილი „ევროპა ნოსტრას“ ვიცე-პრეზიდენტს პიეტ იასპარს შეხვდა, რომელთანაც კულტურული მემკვიდრეობის სფეროში თანამშრომლობის გაღრმავების შესახებ ისაუბრა.
„ევროპა ნოსტრამ“ საქართველოს ხელოვნების სასახლეს ჟიურის სპეციალური ჯილდო ნომინაციაში „რესტავრაცა–კონსერვაციისთვის“ მიანიჭა.
„ევროპა ნოსტრა“ ერთ-ერთი უმსხვილესი საერთაშორისო ორგანიზაციაა, რომელიც აერთიანებს 5 მილიონზე მეტ ადამიანს, 250 წევრ ორგანიზაციას და 150 ასოცირებულ წევრს, მათ შორის, ისეთ მსხვილ კორპორაციებს, როგორიცაა VOLVO, სამთავრობო უწყებები, ადგილობრივი თვითმმართველობები და ა.შ. „ევროპა ნოსტრა“ მჭიდროდ თანამშრომლობს UNESCO-სთან და ევროპის საბჭოსთან. ევროპა ნოსტრას ჯილდო – ევროპის კავშირის პრიზი კულტურული მემკვიდრეობისათვის, ყოველწლიურად ენიჭება ამა თუ იმ პროექტს, კულტურული მემკვიდრეობის დარგში საუკეთესო მიღწევებისათვის შემდეგი მიმართულებით – კონსერვაცია, კვლევა და დიგიტალიზაცია, განათლება, ტრენინგები და ცნობიერების ამაღლება.
აღსანიშნავია, რომ 2006 წელს ხელოვნების საერთაშორისო ცენტრი “ტიმოთესუბნის ღვთისმშობლის მიძინების ტაძრის” პროექტისათვის ევროკომისიის კულტურული მემკვიდრეობის დაცვის ” Europa Nostra”-ს პრიზის მფლობელი გახდა.
